Ang ebanghelista nga si San Mateo usa ka Kristiyano ug magtutudlo sa Balaod; batid siya sa mga saad sa Dios ngadto sa Israel ug alang kaniya, ang mga pulong ug mga buhat ni Jesukristo naghatag ug katumanan adtong tanan. Busa, diha sa iyang ebanghelyo, giprisentar niya ang mga pagtulon-an ni Jesus ug giporma niya pinaagi sa lima ka dagkong mga diskorso, kay si Jesus giisip niya nga bag-ong Moises.
Kining Pulong sa Kinabuhi mao ang panghinapos sa “diskorso sa misyonario”, kansang sinugdan mao ang panawagan ni Jesus sa iyang doce ka apostoles ug usab nagpasabot kini sa mga kakulian sa pagsangyaw: may mga tawo nga dili makasabot ug ang mga pagpanglutos nga mahiagoman nila, diin gikinahanglan gayod ang madanihong pagsaksi, lakip na ang lig-on nga mga pagdesisyon.
Apan mas makahuloganon pa gayod kini: gipadayag ni Jesus nga ang pagpadala niya sa iyang mga tinun-an may sukaranan: gikan mismo sa Misyon nga nadawat ni Jesus sa Iyang Amahan. Usa kini ka buhing pagtulon-an gikan sa Daang Kasulatan: dinha sa mensahero sa Dios nagpaluyo ang presensya sa Dios. Busa, ang gugma mismo sa Dios nga, pinaagi sa saksi ni Jesus ug sa mga tawo nga iyang pinadala, daw tubig modagayday sa tagsatagsa kanato.
“Ug hinumdomi kini: kadtong magpainom bisan na lag bugnawng tubig sa labing ubos sa akong mga sumusunod, tungod kay siya akong sumusunod, gantihan gayod.”
Gawas sa mga tawo nga gitagaan ni Jesus ug espesyal nga misyon: mga apostoles, mga pari, mga propeta … gipadayag ni Jesus nga ang kada Kristyano mahimong Iyang tinun-an, ug sa samang higayon, siya maoy tumong sa misyon ug mao usab ang pinadala. Ug isip mga tinun-an, kitang tanan, bisag “way-bili”, tataw nga way-angay ug di-talagsaon ang mga kalidad, gitagaan kitag gahom aron mosaksi nga ang Dios haduol ra sa tawo. Ang tibuok Kristohanong katilingban maoy pinadala ngadto sa tibuok kalibotan kay mao man ang kabubut-on sa Amahan natong tanan.
Pinaagi sa atong isigkatawo, nakadawat ta ug atensyon, alima, pasaylo, pagsalig sa Dios; kitang tanan makahatag ngadto sa uban, aron matagamtam nila ang pagpangga sa Amahan, sama sa gibuhat ni Jesus samtang nagtuman siya sa Iyang Misyon. Tungod kay ang tinubdan mao man ang Amahan, kining mga ginatawag nga “ginagmayng butang” maoy makahatag ug kabag-ohan sa kalibotan bisan usa lamang kini ka basong tubig bugnaw.
«Dili importante kon gamay ra o daku ba ang gihatag. Maoy importante “kon giunsa nimo” paghatag, kon may gugma ba bisan lamang ang gamay nga pagpakabanâ ngadto sa uban. Usahay, igo nang mohatag tag usa ka basong tubig bugnaw, […] usa ka yanong buhat apan dako sa mata sa Dios kon gibuhat nato kini sa Iyang Ngalan, buot ipasabot inubanan sa gugma. […] Ang Pulong sa Kinabuhi ning bulana makatabang nato sa pagkaplag sa bili sa matag lihok nato: ang pag-asikaso sa balay , sa uma, o sa opisina, ang paghan-ay sa mga buluhaton sa trabahoan, mga gipangayo sa eskwelahan, mao usab ang mga katungdanan sa katilingban o gobyerno, sa politika o sa relihiyon. Mabag-o nato kining tanan diha sa pag-alagad nga matinahoron ug maampingon. Ang gugma maghatag natog bag-ong mga mata aron mataligam-an nato unsay angay buhaton para sa uban ug aron matabangan nato sila sa mabuhangong mga pamaagi ug diha sa pagkamanggihatagon. Unsay bunga niini? Ang pag-inambitay sa mga gasa, tungod kay ang gugma nagbunga ug gugma. Mapilôpilô ang kalipay tungod kay”mas malipayon ang naghatag kaysa nakadawat”1»2.
“Ug hinumdomi kini: kadtong magpainom bisan na lag bugnawng tubig sa labing ubos sa akong mga sumusunod, tungod kay siya akong sumusunod, gantihan gayod.”
Makusganon kining awhag ni Jesus: ayaw pugngi ang dagayday sa gugma sa Dios. Giawhag ta niya sa pagkab-ot sa matag lalaki ug babaye, uban sa kasingkasing nga mahinangpon ug tinuoray nga pangalagad, buntogon ang mga babag ug mga pagsaway.
Kabubut-on sa Dios ang pagbinuligay, himoon nato ang mga mabungahong pamaagi alang sa kaayohan sa katilingban. Sugdan nato diha sa mga ginagmayng buluhaton sa matag adlaw, apan sa samang higayon ang Ginoo dili magkawang sa Iyang mga pahalipay: anaa siya kanunay sa atong kiliran, giamuma ta Niya ug gikuyogan ta sa atong Misyon.
“[…] Mibiya ko sa trabaho didto sa Pilipinas ug miadto ko sa Australia aron mopuyo uban sa akong pamilya […] nakakita kog trabaho sulod sa usa ka kompaniya nga maoy molimpyo sa mga sala kan-anan, mga lugar diin mag-ilis ug uniporme ang mga trabahante, mga opisina ug mga talad-kan-anan diin mokaon ang labaw sa 500 ka mga trabahante. Layo ra kaayog kalainan sa trabaho nako kaniadto isip usa ka engineer […] Tungod sa akong gugma sa isigkatawo, giampingan nako nga ang mga lugar kan-anan kanunay limpiyo ug hapsay. Apan di malikayan nga may mga tawo,nga wala gayoy pagtagad sa kalimpyo sa palibot […]. Wala ako magkawang sa akong pasyensya tungod kay alang kanako mga higayon kini nga higugmaon nako si Jesus sa akong isigkatawo. Sa hinayhinay, kining mga tawhana nagsugod na ug paglimpiyo human sa ilang pagpaniudto ug sa wala madugay nahimo na kaming suod nga mga higala ug nagsugod silag hatag pagtahod ug pagsalig alang kanako, […] Nasinati nako nga ang gugma diay makatakod ug ang tanang butang nga atong mahimo diha sa gugma magpabilin hangtod sa kahangturan”3.
Sinulat ni Letizia Magri uban sa mga kagrupo sa Pulong sa Kinabuhi
