Abril 2024
“Uban sa dakong gahom, ang mga apostoles nagsaksi mahitungod sa pagkabanhaw sa Ginoong Jesus ug ang Dios nagpanalangin pag-ayo kanilang tanan.” (Buhat 4:33)
Kining Pulong sa Kinabuhi, nga tukma sa panahon sa Pasko sa Pagkabanhaw, nag-awhag kanato, inubanan sa hingpit nga kagawasan isip mga tawo nga nakadawat sa mensaje sa Ebanghelyo, nga unta kita usab mamahimong mga saksi sa panghitabo nga di na mapapas sa kasaysayan: Si Kristo nabanhaw!
Aron masabtan pag-ayo ang kahulogan ning tudling nga kinutlo gikan sa basahon sa Mga Buhat sa mga Apostoles mas maayo nga hisgotan nato ang mga nahiunang bersikulo: «Ug ang katilingban sa mga magtutuo nagbaton ug usa ka kasingkasing ug kalag, ug walay bisan kinsa sa mga adunay mga katigayonan nga miangkon nga iyaha kini, apan nag-inambitay sila sa tanan»1.
“Uban sa dakong gahom, ang mga apostoles nagsaksi mahitungod sa pagkabanhaw sa Ginoong Jesus ug ang Dios nagpanalangin pag-ayo kanilang tanan.”
Mabasa nato ning tudling diin giprisentar ang unang Kristohanong katilingban nga dinasig ubos sa gahom sa Espirito, tataw kaayo ang kinaiya sa pag-inambitay nga nagtukmod kanila sa pagsangyaw ngadto sa kalibotan mahitungod sa tibuok Ebanghelyo, ang Maayong Balita, nga sa laktod nga pagkasulti si Kristo Nabanhaw!.
Mao gihapon kining mga tawhana nga sa wala pa ang Pentecostes nangahadlok kaayo sila ug nawagtangag kadasig atubangan sa mga panghitabo nga nahiagoman ni Kristo ug karon nanggawas na silang tanan, andam sa pagsaksi bisan ug ang naghulat mao ang kamatayon isip mga martir, salamat sa gahom sa Espiritu nawagtang ang kakulba ug kahadlok.
Sila usa ra ka kasingkasing ug usa ra ka kalag, gipuy-an nila ang paghigugmaay hangtod sa pagpakig-ambit sa ilang mga katigayonan: mao kini ang pamatasan nga gisaksi nila ug mao nga mikaylap ug nadugangan ang numero sa mga tawo nga miapil ug mibuhat sa ingon.
Mga babaye ug lalaki nga misunod kang Jesus naminaw sa Iyang mga Pulong, miuban sila Kaniya diha sa mahigugmaong pag-alagad ngadto sa mga kabus, mga masakiton; nasaksihan sa ilang mga mata ang mga kahibulongang milagro nga gihimo ni Cristo, nausab ang ilang mga kinabuhi tungod kay gitawag man Niya sila sa pagpuyo sa Bag-ong Sugo, nahimo silang unang mga saksi sa buhing presensya sa Dios taliwala sa katawhan. Apan alang kanato, mga tinun-an ni Jesus ning panahona, unsay buot ipasabot sa pagsaksi?
“Uban sa dakong gahom, ang mga apostoles nagsaksi mahitungod sa pagkabanhaw sa Ginoong Jesus ug ang Dios nagpanalangin pag-ayo kanilang tanan.”
Ang mas mabungahon ug makapatandog nga pagsaksi sa pagkabanhaw mao ang pagpakita nga buhi Siya ug nagpuyo uban kanato. «Kon puy-an nato ang Iyang mga Pulong, […] ug kon ang kasingkasing nagdilaab sa gugma ngadto sa isigkatawo, ug kon paningkamotan nato ang makanunayong pagpalambo sa paghigugmaay sa usagusa; nan, ang Nabanhawng Kristo
mopuyo sulod kanato, mopuyo taliwala sa tanan ug mosanag sa atong palibot ang Iyang kahayag uban ang mga grasya, nga maoy makapabag-o sa atong palibot ug dili masukod ang mga bunga niini. Ug Siya gayod, pinaagi sa Iyang Espiritu mao ang mogiya sa atong mga lakang ug sa atong mga aktibidad; Siya ra gayod ang mag-igo sa tanan ug mohatag sa mga higayon aron madala nato ang Iyang kinabuhi ngadto sa mga tawo nga nagkinahanglan kaayo Niya».
“Uban sa dakong gahom, ang mga apostoles nagsaksimahitungod sa pagkabanhaw sa Ginoong Jesusug ang Dios nagpanalangin pag-ayo kanilang tanan.”
Misulat si Margaret Karram: «“Pangadto kamo sa kalibotan ug isangyaw ang Ebanghelyo sa tanang katawhan” mao kini ang talagsaong tugon nga gitugyan sa mga Apostoles niadtong 2000 na ka tuig nga milabay. Nadungog nila kini gikan sa baba mismo ni Jesukristo nga mao ang nakausab sa dagan sa kasaysayan. Karong mga panahona, si Jesus mao gihapon ang nagdapit kanato sa maong tugon: gitagaan ta Niyag kahigayonan sa pagdala Kaniya ngadto sa kalibotan lakip sa atong personal nga abilidad sa pagkamabungahon, kapasidad ug kagawasnon nga Siya mismo maoy naghatag ».
Mao kini ang pagsangyaw «nga dili matapos diha sa Iyang kamatayon, mas mikaylap pa hinuon! Human sa Iyang pagkabanhaw naghatag hinuon ug tumang kaisog ug sa adlaw sa Pentekostes, ang mga tinun-an nahimong maisogong mga saksi sa Ebanghelyo. Mao kini ang gisugo Niya kanila,ug unya, miabot hangtod karong adlawa dinhi kanato. Pinaagi kanako, pinaagi sa tagsatagsa kanato, buot mopadayon ang Dios sa pagsaysay sa Iyang sugilanon bahin sa iyang gugma ngadto sa mga tawo nga mahimamat nato bisan sa makadiyot lamang o sa dugay nang panahon».
~ Gikan ni Patrizia Mazzola ug mga kagrupo sa Pulong sa Kinabuhi ~
