“Nakalugsong na sila ug nakaabot sa patag nga dapit, uban kang Jesus ang kapid-an sa iyang mga tinun-an, ug mas daghan pa gikan sa tibuok Judea, Jerusalem ug sa mga kabaybayonan sa Tiro ug Sidon; nagkatapok sila aron maminaw kang Jesus…” Mao ni ang mga pulong nga gigamit ni San Lucas isip pasiuna sa taas nga wali ni Jesus, nga sa hinayhinay mipatin-aw mahitungod sa mga Kabulahanan, mga tulomanon nga angay buhaton alang sa Gingharian sa Dios ug ang mga saad sa Dios Amahan ngadto sa Iyang mga anak.
Walay pugong-pugong ang pagsangyaw sa Iyang mensahe ngadto sa mga lalaki ug babaye, sakop sa nagkalainlaing pundok sa katawhan ug kultura, kinsa nagkatigom aron makapaminaw kaniya; ang Iyang mensaje para sa tanan; kinsa kadtong makadawat sa gihisgotang mensaje makakab-ot sa kahingpitan isip tawo, tungod kay ginamậ man siya sa panagway sa Dios-Gugma.
“Panghatag kamo sa uban, ug ang Dios mohatag kaninyo: madawat ninyo ang hustong takos, ug pakapinan pa gayod, ibubo sa inyong mga kamot kutob sa inyong mahagkom”
Si Jesus mipadayag sa kabag-ohan sa Ebangelyo: Ang Diyos Amahan, personal nga nahigugma sa kada usa sa iyang mga anak ug gugma nga “nag-awas-awas”. Gibutang niya sa matag tawo ang capasidad sa pag-inat sa kasing-kasing ngadto sa iyang mga igsoon pinaagi sa pagkamanggihatagon. Mga pulong kini nga may gimbug-aton ug may-pagkadinalian: paghatag gikan gayod sa atong kabtangan, apil ani ang pagtinagdanay, pagkamaabiabihon, ug pagpasaylo subay sa sukdanan sa Dios nga walay kinutoban.
Ang hulagway sa kabuhong sa ganti nga moabot sa atong mga kamot, makahatag nato’g kakayahan sa pagsabot nga ang gugma sa Dios para kanato walay sukod. Ang Iyang mga saad matuman sulod sa atong kinabuhi nga wala nato damha ug pakapinan pa gayod. Kanang way sukod nga gugma sa Dios maoy makahanaw sa atong mga gikahadlokan, wala na kita gaposa sa atong mga gilauman nga makadawat ta gikan sa uban sumala sa atong gihimong sukdanan.
“Panghatag kamo sa uban, ug ang Dios mohatag kaninyo: madawat ninyo ang hustong takos, ug pakapinan pa gayod, ibubo sa inyong mga kamot kutob sa inyong mahagkom”.
Bahin aning awhag ni Jesus, si Chiara Lubich misulat: «Nakasulay ka na ba’g dawat ug regalo gikan sa imong amigo ug nabati nimo nga angay siyang baslan? […] Kon nabati man nimo kini, hunahunaa nga mao sad ni ang buhaton sa atong Ginoo –ang Dios-Gugma. Kanunay siyang mobalos sa matag regalo nga ihatag nato sa atong isigkatawo, diha sa Iyang Ngalan […] Ang Ginoo dili mobuhat niini aron madato ka o nga kitang tanan madato. Gihimo Niya kini […] tungod kay, kon makaangkon ta’g daghan, mas daghan ang mahatagan. Isip matuod nga tigdumala sa mga kaayohan sa Dios – makapaambit ta sa atong kaayohan diha sa katilingban nga nag-alirong kanato […]. Sigurado nga ang tuyờ ni Jesus mao ang ganti nga maangkon nato didto sa Paraiso; apan unsay mahitabo dinhi sa yuta, mao na kini ang pasiuna ug garansiya».
“Panghatag kamo sa uban, ug ang Dios mohatag kaninyo: madawat ninyo ang hustong takos, ug pakapinan pa gayod, ibubo sa inyong mga kamot kutob sa inyong mahagkom”.
Hunahunaa unsa kahay mahitabo kon kitang tanan magpuyo sa mahigugmaong pag-alagad, kuyog sa ubang hugpong sa katawhan? Sigurado gayod nga mausab ang panagway, mosalingsing ang bag-ong katilingban.
Si Jesứs nga taga-España mipaambit sa iyang kasinatian: «Ang akong negosyo uban sa akong asawa usa ka “Business Management and Training Company”. Dili pa dugay nakabig mi sa mga prinsipyo sa Economy and Communion. Among nakat-onan ang daghang pamaagi unsaon pagtagad alang sa kaayohan sa uban: –among mga trabajante, apil ang pag-asikaso sa ilang sweldo, pagsota’g mga pamaagi sa pagpapha sa trabaho; ang pagtratar sa mga suppliers, pagtahod sa mga presyo, mga paagi sa pagbayad, ug pagtuman sa mga gikontrata nga bayronon; ang pakig-abiabi sa ubang mga Companiya sama sa amoa, aron makigdungan ug tudlo bahin sa Negosyo ug pagpakig-ambit sa among ‘know how’ (ang among nakutlo gikan aning bag-ong kasinatian), bahin sa mga kostumer, apil ang mga tambag bahin sa hustong pamatasan sa negosyo, bisan pa’g wala mi mapaabot nga ganansya. Kining pagsalig sa usagusa maoy nakaluwas kanamo sa krises sa miaging tuig 2008.
Sukad adtong higayona, pinaagi sa NGO “Levántate y Anda” (Bangon ug Lakaw), nakahimamat mi ug usa ka maestro sa Español nga taga Ivory Coast. Buot niya nga mouswag unta ang kahimtang sa iyang Barrio pinaagi sa pagtukod ug Balay Paanakan (maternity clinic). Gisota namo ang projekto ug gihatag namo ang igong kantidad aron matukod kini. Halos wala siya makatuo! Gipatin-aw namo nga gikan to sa ganansya sa among Kompaniya. Karon ang Balay Paanakan ginganlag “Pag-inigsoonay”, tungod kay ang mipanday niini mao ang mga Muslim ug mga Kristyanos,nahimo kining simbolo sa Kalinaw sa Lungsod. Human sa mga tuig nga milabay ang ganansya sa among Kompaniya mipilo-pilo ug kanapulo».
Letizia Magri
