Ang sulat, diin gikutlo ning Pulong sa Kinabuhi, giisip nga usa ka testamentong espiritual ni San Pablo. Ang Apostol miadto sa Roma, anaa siya sa prisohan, ug naghulat nga sentensiyahan. Misulat siya kang Timoteo, batan-on nga tinun-an ug kaabag niya, pangulo sa dili sayon nga komunidad sa Efeso.
Ang sulat adunay mga pahimangno, mga tambag nga gitumong alang kang Timoteo, apan kini tukma usab nga ipakisayod sa kada sakop sa Kristohanong komunidad kaniadto ug karong panahona. Gikadenahan si San Pablo tungod kay nagsangyaw siya sa Ebanghelyo ug buot niyang dasigon kining iyang tinun-an aron magmalig-on siya isip giya sa tibuok komunidad. Nalisang si Timoteo tungod sa mga panglutos nga giantos niya tungod kay nagtuman sa iyang katungdanan. Nagduhaduha siya atubangan sa mga kalisdanan sa pagsagubang sa mga pagsulay. Dili natural alang kang Pablo ug ni Timoteo nga mag-antos sila tungod sa Ebanghelyo, apan posible ang pagsaksi niini tungod kay nagasalig sila sa gahom sa Dios.
“Kay ang Espiritu nga gihatag sa Dios kanato dili Espiritu sa katalaw, kondili Espiritu sa gahom ug gugma ug pagpugong sa kaugalingon”.
Si San Pablo buot mosaksi sa Ebanghelyo. Tataw kaayo nga dili ang mga talento, abilidad sa tawo o ang atong mga kahuyang maoy garansiya o babag sa Misyon sa pagsangyaw sa Pulong sa Dios; hinuon, ang mga gasa sa Espiritu Santo, ang gahom, ang Diosnong gugma ug ang pagpugong sa kaugalingon, maoy mogaransiya sa gahom sa pagsaksi. .Ang Diyosnong gugma, taliwala sa gahom ug pagpugong sa kaugalingon, daw kaabag sa paghukom unsay angay pagabuhaton; diha sa pagpugong sa atong kaugalingon gipadayag nimo ang kaalam ug andam ka nga mosagubang sa kada sitwasyon. Si Timoteo, isip tinun-an sa tanang panahon, makasangyaw sa Ebanghelyo nga puno sa gahom, Diyosnong gugma ug pagpugong sa kaugalingon, hangtod gayod sa pagpasakit tungod sa Ebanghelyo.
“Kay ang Espiritu nga gihatag sa Dios kanato dili Espiritu sa katalaw, kondili Espiritu sa gahom ug gugma ug pagpugong sa kaugalingon”.
Kita usab nakasulay nga gitintal aron mawagtangang kadasig sa pagpuyo ug pagsaksi sa Pulong sa Dios, ug wala ta masayod unsaon pagsagubang sa mga panghitabo.
Si Chiara Lubich nagtabang kanato sa pagsabot diin nato makaplagan ang gahom niining mga gutloa: «Kinahanglan nga makaamgo ta sa presensya ni Jesus sulod kanato. Dili ta angay magpadaug sa atong gibati, ug mohunong daw wala na tay mahimo, hinuon, buntogon ta ang atong kaugalingon, ihiusa nato ang atong kabubut-on sumala sa nasabtan nato nga kabubut-on sa Dios, tumanon pag-ayo ang mga katungdanan takdo sa gipangayo sa atong bokasyon, kay misalig kita sa grasya sa Diyos sulod kanato. Kalimtan ta ang atong kaugalingon. Si Jesus mismo maoy mopalambo sulod kanato sa mga birtud nga atong gikinahanglan aron isaksi nato Siya diha sa mga aktibidad nga gipiyal Niya kanato.»1.
“Kay ang Espiritu nga gihatag sa Dios kanato dili Espiritu sa katalaw, kondili Espiritu sa gahom ug gugma ug pagpugong sa kaugalingon”.
Gahom, gugma ug pagpugong sa kaugalingon, tulo ka birtud gikan sa Espiritu Santo nga maangkon nato pinaagi sa pag-ampo ug pagbansaybansay sa pagtuo.
Si Padre Justin Nari, nga taga Republika Africa Central, gibaharan sa kamatayon uban sa iyang mga kauban sa kombento ug uban sa usa ka libong mga Muslim nga mieskapo tungod sa kagubot sa gubat ug nangayog tabang ngadto sa Simbahan. Daghang higayon nga ang mga nangulo sa kasundalohan misulong kanila buot nga ipa-surrender ang mga Muslim; apan ang pari nagpadayon ug pakigsulti ug paghangyo kanila aron mapugngan ang pag-paagas sa dugo. Usa ka adlaw niana nagdala sila ug 40 ka litros nga gasolina ug gibaharan nga sunogon silang tanan nga buhi kon dili nila itugyan ang mga Muslim. «Uban sa akong mga igsoon sa kombento gisaulog namo ang kataposan namong Misa– misugilon si Padre Justin – ug nahinumdom ko sa gisulti ni Chiara Lubich. “Unsa kahay buhaton niya kon siya pa ang naa sa akong lugar? Magpabilin siya ug itahan niya ang iyang kinabuhi. Ug mao kadto ang among gihukman nga pagabuhaton”. Nahuman ang Misa ug mibagting ang telepono nga wala damha: “ang mga sundalo sa Hiniusang Africa misuroy didto sa among Rehiyon, didto sa siyudad nga duol ra namo”. Si Padre Justin midagan aron pagpakigtagbo kanila ug gikuyogan nila siya pag-adto sa Parokya: kulang na lamang ang 13 ka minutos ug mahuman na ang gitagal nga oras sa ultimatum; trece ka minutos na lang apan napugngan ang pagpaagas sa dugo ug wala gayod makalas ang kinabuhi sa tanan»2.
Letizia Magri
