Ang kahayag sukad pa sa sinugdanan maoy simbolo sa kinabuhi. Kada adlaw naghulat ta sa kabuntagon tungod kay nagdala kinig mensahe sa pagsugod pag-usab. Ang paghisgot bahin sa kahayag diha na daan sa mga sugilanon sa nagkadaiyang katawhan ug sa mga karaang relihiyon. Ang Tradisyon nga gitamod sa mga Judio mao ang pagsaulog sa Fiesta sa Kahayag, ang ginatawag nga Hanukkah, tungod kay nagpahinumdom kini nila niadtong higayon nga gibalik nila pagkonsagrar ang Templo sa Jerusalem ug ang paglingkawas nila gikan sa mga kulto sa pagano. Ang mga Muslim nagdagkot ug mga kandila sa adlawng natawhan sa Propeta, ginatawag kini nga Mawlid sa pinulongang Arabo o Mevlid Kandili sa pinulongang Turco. Ang Fiesta sa Diwali, kansang ngalan gikuha gikan sa mga naglaray nga mga suga, nagsugod gikan sa Fiesta sa mga taga-India; gisaulog usab kini sa mga nagkalainlaing mga relihiyon sa India aron saulogon ang kadaugan sa maayo batok sa dautan.
Alang sa mga Kristiyanos si Jesukristo mao ang kahayag nga nagdan-ag ibabaw sa kangitngit sa kalibotan. Nan, ang kahayag usa ka butang nga buhong sa lig-on nga mga simbolo, nagriprisintar sa langitnong presensya, usa ka gasa alang sa tawo ug sa tibuok yuta.
«Kamong tanan iya sa kahayag ug iya sa adlaw. Dili kita iya sa gabii ni iya sa kangitngit.»
Apan unsa man ang kinaiya sa mga anak sa adlaw? Usa niini mao ang “dili pagkahisakop sa gabii, dili ta iya sa kangitngit”. Biyaan ang pagkahingatulgon ug pagkawalay-pagpakabanâ ug ipuli ang pag-amping ug pagtukaw. Usa kini ka mahigugmaong pagpili diha sa hingpit nga pagpuyo sa matag takna sa atong kinabuhi.
Ang makusganon nga pag-awhag sa Apostol ngadto sa komunidad sa Tesalonica mao gayod ang pagpakig-uban sa pagtukaw; isalikway nato ang tanang klase sa binuang ug walay pagpanumbaling sa uban. Niining panahona ang tanang katawhan nagkinahanglan gayod sa kahayag, ug kadtong mga tawo nga dili iya sa gabii, adunay katungdanan sa pagdalag kahayag sulod sa mga relasyon sa katilingban. Diha sa makanunayong pag-alagad o pagsakripisyo sa kaugalingon, masaksihan ang presensya sa Nabanhawng Kristo inubanan sa pagtuo, paghigugma ug paglaum, sumala sa gisulat ni San Pablo (cf. 1 Tes 5:8).
Ug dugang pa niini, kinahanglan nga patubuon ang hugot ug bug-os nato nga relasyon ngadto sa Dios, sa kinahiladman sa atong kasingkasing. Hatagan natog higayon ang atong kaugalingon sa pakig-istorya Kaniya pinaagi sa pag-ampo, sa pagbansaybansay sa Iyang mga Pulong nga mao gayod ang makapadan-ag niining kahayag.
«Kamong tanan iya sa kahayag ug iya sa adlaw. Dili kita iya sa gabii ni iya sa kangitngit.»
Usahay kita usab maanad na lang sa pagpuyo sulod sa kangitngit sa atong kasingkasing o para nato igo ra ang daghang mga suga nga artifisyal, diha sa mga nagkalainlaing kalibotanong kalipay. Apan ang Ginoo nagtawag nato kanunay sa pagpadan-ag sa Iyang kahayag sulod sa atong kaugalingon. Magkat-on ta sa kinasingkasing pagtagad sa uban ug sa ingon, mataligam-an nato ang mga bidlisiw sa kahayag nga anaa sulod sa tawo ug sa mga panghitabo.
Paningkamotan nato pagtuman kanunay sa mga desisyon nga makapabag-o nato, diha sa pagbalhin gikan sa kangitngit ngadto sa kahayag. «Kon ikaw Kristiyano dili ka makaikyas sa kalibotan, dili motago o moisip nga ang relihiyon usa ka pribado nga butang», misulat si Chiara Lubich. «nagpuyo ka sa kalibotan tungod kay anaa kay katungdanan, may misyon ka atubangan sa tanang katawhan: ipadan-ag ang imong kahayag. Ikaw usab may pagahimoon, ug kon dili mo kini buhaton, ang imong pagkawalay pulos sama ra sa asin nga nawagtangag kaparat o sama ra sa kahayag nga milandong sa kangitngit.1 […] « Ang pagahimoon sa usa ka Kristiyano mao gayod ang pagpagawas niining kahayag gikan kaniya, ug mahimo siyang “timailhan” sa presensiya sa Dios taliwala sa katawhan» 2 .
«Kamong tanan iya sa kahayag ug iya sa adlaw. Dili kita iya sa gabii ni iya sa kangitngit.»
Ang Dios mao ang kahayag ug mahipalgan lamang Siya niadtong mga tawo nga nangita kaniya uban sa tim-os nga kasingkasing. Bisag unsay mahitabo, dili gayod kita mahibulag gikan sa Iyang gugma tungod kay kita Iyang mga anak. Kon hugot ang atong pagsalig bahin niini dili gayod kita mahangangha ni madat-ugan sa mga panghitabo nga makapakurog sa kakuyaw.
Ang linog nga nahitabo ning tuiga didto sa Turkey ug sa Syria, nga nakapagan ug kapin 50 mil ka biktima, nakapahugno sa kinabuhi sa milyonmilyon ka mga tawo. Kadtong mga tawo nga nakaikyas sa trahedya, ang mga lumolupyo sa tibuok lungsod ug sa ubang nasod sa kalibotan nagriprisentar samag mga puntos sa kahayag nga misagubang aron makadalag tabang sa labing madaling panahon ug mopagaan sa kaguol niadtong mga nawagtangag minahal sa kinabuhi, puloy-anan, ug kabtangan.
Ang kangitngit dili gayod makabuntog niadtong mga tawo nga mopili sa pagpuyo diha sa kahayag ug sa pagpadan-ag sa kahayag. Alang natong mga Kristiyanos nagpasabot kini sa kinabuhi diin anaa si Kristo sa atong taliwala; Siya usa ka presensiya nga mohatag sa posibilidad sa pag-ablig mga tuboran sa kahayag. Kini makapabalik sa paglaum, ug nag-awhag kanato nga magpuyo diha sa gugma sa Dios.
~Gikan ni Patrizia Mazzola uban sa grupo sa Pulong sa Kinabuhi~
