Ang Pulong sa Kinabuhi ning bulana kinutlo gikan sa sulat ni San Pablo ngadto sa mga taga-Roma, nga buhong sa mga pagtulon-an. Giprisentar niya ang kinabuhi sa usa ka Kristiyano nga usa ka kahimtang diin naghingapin ang gugma, gugmang di-mabayran ug salapi ug walay kinutoban nga gibubô sa Dios sulod sa atong kasingkasing ug sa atong bahin usab kinahanglang ihatag ngadto sa uban. Aron mas epektibo ang pagsabot niini, gipamub-an niya ang duha ka ideya nga nahimong usa lamang ka pulong: “philostorgos”, nagpadayg kinig duha ka hiyas nga talagsaon sa gugma, ug tungod niini ang komunidad sa mga Kristyanos mailhan ug mabatyagan sa uban: ang gugma isip mga amigo ug ang gugma isip kapamilya.
“Paghigugmaay kamo pag-ayo ingon nga mga magsoon diha kang Kristo, ug pagtinahoray kamo.”
Hinuklogan nato pag-ayo ning hiyas bahin sa pag-inigsoonay ug pagbaslanay sa gugma. Sama sa gisulat ni San Pablo, ang mga sakop sa komunidad sa mga Kristiyanos nagbaslanay sa gugma tungod kay isigkasakop ra sila sa maong komunidad sa mga Kristiyanos(Rom.12:5), magsoon sila nga adunay usa lamang ka utang nga mao ang gugma (Rom. 13:8), magmalipayon sila kon ang uban malipayon usab, maghilak sila kon may sakop nga naghilak(Rom.12:15), walay gihukman nila ug walay usa nga naghimog eskandalo (Rom.14:13). Ang pagpuyo sa ilang kinabuhi hugot nga nahilambigit sa kinabuhi sa uban ug ang komunidad maoy usa ka buhing saksi sa balaod sa gugma nga gidala ni Jesus dinhi sa yuta. Ang paghigugmaay sa usagusa makahuloganon ug matarong ug andam silang motugyan sa ilang kinabuhi alang sa usagusa. Gugma alang sa usagusa nga masaksihan ug tataw gayod, daw nagkadaiyang mga kolor-ekspresyon sa gugma, nga buot lamang mohatag ug kaayo sa uban; buot lamang ang kalipay sa uban. Gugma nga buot lamang motabang nga ang iyang isigkatawo makakab-ot sa hingpit nga katumanan sa plano sa Dios alang kaniya; naglumbaanay sa paghatag ug bili sa usagusa ug pagdayeg sa mga hiyas sa usagusa. Paghigugmaay nga nagmatngon sa mga panginahanglan sa uban, nagkugi ug naningkamot nga walay maulahi, mahibilin o makalimtan, gugma nga naglihok kanato sa pagtuman sa mga katungdanan sulod sa katilingban : diha sa kinabuhing sosyal, kultural ug sa larang sa politika.
“Paghigugmaay kamo pag-ayo ingon nga mga magsoon diha kang Kristo, ug pagtinahoray kamo”.
Matud pa ni Chiara Lubich, “Kon balikon natog lantaw ang kinabuhi sulod sa primerong mga tuig sa pagsugod sa pagka-Kristiyanos makit-an nato nga ang gugmang Kristohanon, walay gipili ug parihas ang pagtagad sa tanang klase sa tawo; gihatagan kinig ngalan: gitawag kini ug “philadelphia” ug ang buot ipasabot niini mao ang gugma isip mga igsoon. Niadtong mga panahona, ang kahulogan nga gihatag alang niining pulonga nagpasabot sa gugma lamang sa kaugalingong mga igsoon ug kadugô.”
Walay usa nga mihisgot niini isip gugma alang sa kasakop sa usa ka katilingban. Sulod lamang sa Bag-ong Kasulatan nga may kalabotan ug nahilambigit na ang uban» Daghang mga kabatan-onan karon nangandoy ug buot nga makatagamtam «sa usa ka hugot nga relasyon, diin masinati ug mabati nila ang matuod nga gugma.” Ang paghigugmaay sa unang mga Kristiyanos nagsaksi niining mga hiyas sa gugma ingon nga mga igsoon, sama pananglit sa kahugot ug kalig-on sa pagtinahoray».
“Paghigugmaay kamo pag-ayo ingon nga mga magsoon diha kang Kristo, ug pagtinahoray kamo”.
Usa ka hiyas diin mailhan nato ang mga sakop niining maong komunidad nga nagpuyo ning paghigugmaay mao ang ilang pagkamahinangpon, able ang kasingkasing sa pagdawat sa uban, andam mosagubang sa mga hagit nga moharong sulod niining mga komunidad diin sila nagtrabaho ug nagtinabangay.
Si J.K., nga nagpuyo sa Serbia, sa nasod sa Hungary, nga may tulo ka anak human sa dugay nga panahon nakapalit na gayod ug puloy-anan alang sa iyang pamilya apan tungod sa usa ka dautang panghitabo nawad-an ug salapi ug wala nay kalig-on sa panglawas aron sa hinayhinay mapanday ug maayo niya ang balay. Mao kadto nga ang komunidad sa Focolare naghimog kalihokan aron matabangan siya sa pagtuman sa iyang gipangandoy.
Ang kalihokan sa “#daretocare” nga gimugna sa mga Kabatan-onan sa “Youth for a United World”.
Madasigon siyang misaysay bahin sa paglumbaanay sa pagtabang aron matuman ang gipangandoy niining amahan sa tulo ka anak: «Daghan kaayong nangabot nga mitabang kanako, sulod sa tulo ka adlaw naayo na gayod ang atop ug ang kisame nga yuta lamang ug kugon gipulihan kini ug hardiplex». May mga tawo gikan sa Czeck Republic nga mihatag ug salapi aron mahimo ang trabaho sa pag-ayo sa tibuok balay. Kining ilang gibuhat maoy saksi sa usa ka komunidad nga milambo na ug mikaylap, ug sa walay paghunong, mihaylo na sa mga distansya ug mga utlanan.
Gikan sa grupo sa Pulong sa Kinabuhi ni Patrizia Mazzola
