Ang Pulong sa Kinabuhi ning bulan sa Enero kinutlo gikan sa unang kapitulo ni Propeta Isaias. Kining tudling maoy gipili alang sa Semana sa Pag-ampo alang sa Kahiusahan sa mga Kristiyanos, nga gisaulog sa mga nasod sa amihanang bahin sa kalibotan, matag tuig gikan sa petsa18 hangtod sa 25 sa Enero. Ang mga basahon ning kasaulogan giandam sa usa ka grupo sa mga Kristiyanos sa Minnesota, usa ka dapit sa America1. Ang tema mahitungod sa Hustisya makatandog pag-ayo ug makahikay ug daghang dibate. Ang way-kaangayan, ang pagpanamastamas ug ang mga binuhatan nga way-katarongan nagatubô sulod sa mga katilingbang nagalisod ug saksi bahin sa usa ka Kultura sa Kalinaw ug Kahiusahan.

Sa panahon ni Isaias dili kaayo lahi ang mga tawo sa panahon karon . Ang mga gubat, ang pagsukol ug pagkontrahay, ang pagpadaghan ug kwarta, pagpatigbabaw sa gahom, paghimog mga diosdios, pagsalikway sa mga kabus, maoy nakapatipas sa hustong dalan para sa katawhan sa Israel. Ang propeta mipahimangno ginamit ang hait ug makusganong mga pulong aron pagtawag sa iyang katawhan sa pag-usab sa ilang kinabuhi, ug gitudlo niya ang dalan diin angay silang mobalik subay sa espirito sa sinugdanan sa Kasabotan nga gihimo sa Dios uban kang Abraham.

“Buhata ang maayo; patunhaya ang hustisya.”

Unsay buot ipasabot sa pagkat-on pagbuhat ug maayo? Kinahanglan nga kita usab andam ug buot makakat-on. Sa atong bahin, gikinahanglan ang pagpaningkamot. Sa adlawadlawng dagan sa atong kinabuhi, aduna kanunay mga butang nga angay sabton, angay usbon, kon nasayop man gani ta, mobalik ta sa sinugdan.

Unsay buot ipasabot sa pagpangita sa hustisya? Kini daw usa ka bahandi nga angay pangitaon, pangandoyon, kay mao kini ang tumong sa atong mga binuhatan. Ang pagbansay sa katarong makatabang nato sa pagbuhat sa maayo. Dalî ra natong masabtan ang kabubut-on sa Dios, nga maoy naghatag kanatog kaayohan.

Si Isaias naghisgot ug mga sanglitanan: ang mga tawo nga pinangga sa Dios, tungod kay sila walay kapaingnan, mao ang mga dinaugdaog, mga ilo ug mga biyuda. Ang Dios nag-awhag sa Iyang katawhan sa pagpakabanâ ug pag-atiman sa uban, ilabina kadtong mga hinikawan sa ilang mga katungod. Ang mga katungdanan sa relihiyon, mga ritwal, mga sakripisyo, mga pag-ampo wala niya hikahimut-i kon kining tanan dili kuyogan sa paghimog maayong mga buhat ug pagpatunhay sa hustisya.

“Buhata ang maayo; patunhaya ang hustisya.”

Kining Pulong sa kinabuhi nag-awhag kanato sa pagtabang sa uban, sa pagpakabanâ, sa paghatag ug atensiyon sa mga nagkinahanglan. Kon buot tang mag-usab sa atong kinabuhi, kinahanglang abli ang atong kasingkasing, ang atong panghunahuna, ang atong mga kamot ilabina ngadto sa mga tawo nga anaa sa kalisod.

«Ang pagtinguha ug pagpangita sa hustisya sukad pa sa sinugdan nahisulat na sa konsensya sa tawo, ug ang Ginoo mismo maoy nagkulit niini sa atong kasingkasing. Hinuon, bisan taliwala sa mga bag-ong kausaban ug nakab-ot nga kauswagan latas sa kasaysayan, pagkahalayô gihapon sa tawo atubangan sa hingpit nga katumanan sa proyekto sa Dios! May mga gubat hangtod karon, nagpalabi ang mga terorista, kagubot ug pagkontrahay sa mga katawhan tungod sa kolor sa panit , mao kini ang timaan sa way kaangayan sulod sa mga katilingban ug sa larang sa ekonomiya, pagkawalay katarongan ug hustisya, mga pagdumot. […] Kon walay gugma, pagtahod sa isigkatawo, pagpanumbaling kon unsay iyang gikinahanglan, bisan pag tarong ang pagtinagdanay sa usagusa, malagmit mosangpot kini nga daw trabaho lamang sa opisina, ug dili ta kahatag ug hustong tubag alang sa mga tawhanong kakulian. Kon walay gugma walay tinuod nga hustisya, pag-inambitay sa mga yutan-ong bahandi tali sa dato ug sa pobre, wala tay ikahatag nga atensiyon alang sa atong mga kaigsoonan diha sa ilang lisod nga mga kahimtang»2.

“Buhata ang maayo; patunhaya ang hustisya.”

Ang pagkinabuhi alang sa kahiusahan sa kalibotan mao ang pagtambal sa mga samad sa katawhan pinaagi sa ginagmayng mga salmot aron pagtukod sa hiniusang pamilya sa katawhan.

Usa ka adlaw niana, si J. nga taga-Argentina, sa wala damha, nagkasugat sila sa presidente sa kanhi niyang Unibersidad, ug tungod sa usa ka way-hinungdang rason gipaundang siya pagtudlo. Sa dihang nailhan siya sa presidente, milihay pagpangitag laing agianan, apan si J. milahos pag-atubang kaniya. Nangutana kon unsay balita ug ang presidente misugilon kaniya sa mga lisod nga panghitabo niadtong panahona; nagpuyo na siya sa laing siyudad ug nangitag trabaho.Si J. mihisgot nga makatabang siya; sunod ugma mipahibalo siya sa iyang mga kaila nga may nangitag trabaho. Wala magdugay ang tubag. Sa dihang gibalitaan niya kining kanhi presidente nga may mohatag kaniyag trabaho, hapit dili siya makatuo! Gidawat niya, uban sa kinasingkasing pasalamat ug natandog siya tungod kay siya mismo nga iyang gipaundang pagtudlo maoy nagpakabanâ pagtabang kaniya.

Si J. nakadawat pod ug “gatosan nga panalangin sa langit” tungod kay diha gayod nianang gutloa may mihatag kaniyag duha ka trabaho nga mao gayod ang iyang gipangandoy sa bag-o pa siyang nagsugod pagtudlo sa unibersidad. Siya usab nahangangha ug natandog sa dakong gugma sa Dios alang sa tagsatagsa kanato3.

Sinulat ni Patrizia Mazzola uban sa kagrupo sa Pulong sa Kinabuhi