Kinutlo gikan sa libro ni Profeta Isaias ang Pulong sa Kinabuhi karong bulana. Naghisgot kini bahin sa daghang butang nga bililhon sa Krîstohanong tradisyon; sama pananglit sa pagpahibalo bahin sa Emmanuel , “ ang Diyos naa uban kanato “ o bahin sa Mainantuson nga Sulugoon nga maoy makatabang sa pagsabot sa kasakit ug kamatayon ni Jesukristo.
Kining tudling, nga atong gihisgotan karon, kabahin sa ‘Awit Sa Pagpasalamat’ nga gikanta sa katawhang Israelita, human sa dugay ug pait nga kasakit nga ilang nasinati adtong gipalayas ug gipalayô sila sa ilang kaugalingong nasod, apan sa kataposan nakabalik ug mipauli ra gayod sila sa Jerusalem! Ang mga pulong sa awit, naghatag kanila’g paglaum tungod kay ang Diyos nga mikuyog nila, matinud-anon ug di-matarog, sama sa bato. Ang Diyos mismo maoy gabay sa tanan nilang paningkamot sa pagtukod ug balik sa ilang kinabuhing sibil, pang-politika ug pang-relihiyon. Ang siyudad nga gituohang halangdon nagun-ob kay wala man tukora subay sa plano sa gugma sa Diyos. Ang siyudad hinuon, nga gitukod ibabaw sa bato; buot ipasabot, ang pagkahaduol sa Diyos– maoy makasinati’g kalinaw ug kauswagan.
“Saligi kanunay ang Ginoo, kay ang Ginoong Dios mao ang batong dalangpanan nga magpabilin hangtod sa hangtod” (Is 26,4)
Ang kaseguradohan ug ang kalinaw mao gayod ang gipangandoy ning panahona. Kita usab, personal man o grupo, naglatas diha sa kangitngit sa kasaysayan. Malagmit nga madat-ugan ta ilawom sa kawalay paglaum ug kahadlok sa kaugmaon. Unsa man ang angay buhaton aron paglikay sa tentasyon aron dili ta madaug sa mga kalisdanan ning panahona ug aron dili ta motago ug mag-ugmad sa katahap ug kawalay pagsalig sa atong isigkatawo? Isip mga Kristiyanos walay laing tubag kondili ang “pagtukod na usab”, inubanan sa kaisog, apan una sa tanan pinaagi sa masaligon nga pakig-uban sa Diyos kinsa, diha ni Kristo, mipaduol kanato subay sa mga dalan sa kinabuhi; bisan sa pinakangitngit, pinakapit-os, naglikoliko ug kuyaw nga mga agianan.
Kining pagtuo wala magpasabot nga magpabilin ta sa daplin sa karsada ug maghulat kon unsay mahitabo. Sa tinuoray, kinahanglan nga magpakabanâ ta sa mga panghitabo aron magmabungahon sa pagpasiugda sa pagtukod aning ‘bag-ong siyudad’ kansang sukaranan mao ang Sugo sa paghigugmaay sa usagusa. Ang ganghaan aning siyudad kanunayng abierto aron pagdawat sa tanan ilabina sa mga pobre ug mga timawa: ang mga pinangga sa Ginoo.
Sa atong pagsubay aning dalana siguro malingaw ta sa panag-uban sa daghang mga lalaki ug babaye kinsa naghatag bili sa unibersal nga Mithi sa panaghiusa ug dignidad sa kada tawo, apil ang pag-amping sa Kinaiyahan nga mao ang puloy-anan natong tanan.
“Saligi kanunay ang Ginoo, kay ang Ginoong Dios mao ang batong dalangpanan nga magpabilin hangtod sa hangtod” (Is 26,4)
Sa lungsod Aljucer didto sa España, ang tanang sakop sa usa ka katilingban nagmugna ug Asosyasyon Cultural. Buot sila magtukod ug panag-inigsoonay nga pinasikad sa pakigbulig ug pagdawat sa mga miyembro nga walay pinalabi ug walay gipili. Matud nila nga niadtong 2008 nagtukod sila ug usa ka Asosyasyon Cultural aron makapasiugda sila’g klase-klaseng kalihokan o duyog sa ubang Asosyasyon sa ilang lungsod. Ang ilang tumong: –aron paghatag ug luna o higayon para makadialogo alang sa internasyonal nga mga proyektong makatawo.
Pananglitan, kada tuig sukad adtong pagsugod sa ilang Asosyasyon naghimo sila ug ‘panihapon alang sa usa ka katuyoan’ aron maka-ipon ug igong kwarta alang sa edukasyon sa mga batan-ong Africano kinsa andam mopasalig sa pagtrabaho sulod sa lima ka tuig didto sa ilang nasod nga natawhan. Kining ‘panihapon alang usa ka katuyoan’ nakatipon ug dul-an 200 ka tawo ug ginabuligan sa mga tag-iyag tindahan ug ubang grupo.
“Nalipay usab mi kay sulod sa pipila na ka tuig nakigbulig mi sa ubang Asosyasyon. Uban nila, kada tuig nagsaulog mig mga Programa para sa mga tawo nga nagtrabaho sa larang sa Kultura sama pananglit sa Musika, Pintura, Literatura; apil usab ang mga naa sa Medicina, Politika ug Ekonomiya. Higayon ni sa pagpaambit sa ilang kasinatian bahin sa nagkadaiyang gitrabahoan, pagpaambit usab sa hinungdan sa mga desisyon nga ilang gipili.
“Saligi kanunay ang Ginoo, kay ang Ginoong Dios mao ang batong dalangpanan nga magpabilin hangtod sa hangtod” (Is 26,4)
Hapit na ang Pasko, magsugod na ta karon pinaagi sa pagdawat ug paghangop ni Jesus diha sa iyang mga Pulong. Ug usab, Siya ang bato diin itukod ang siyudad sa tanang tawo. Paningkamotan nato nga mahimo tang buhing simbolo ning siyudara, himoon nato nga maatua kini. Paningkamotan ta nga masinati ang gahom nga mosidlak gikan kanato ug sa atong palibot kon ato ning puy-an. Higugmaon nato ang Maayong Balita, ang Ebanghelyo hangtod nga mausab ang atong kaugalingon ug mobuhagay ngadto sa uban. Dili na kita ang mabuhi kondili si Kristo maporma sulod kanato. Maluwas ta sa atong kaugalingon, libre sa atong limitasyon, libre sa tanan nga nag-ulipon kanato. Masaksihan sa atong mga mata ang pagkaylap sa Rebolusyon sa Gugma, tungod kay si Jesus, libreng nagpuyo sulod kanato, ug motungha Siya sa tugkarang Sosyal diin kitang tanan nahisakop.
