Bag-o lang natukod ang mga Kristohanong komunidad pero ubay-ubay ang mga panaglalis tungod sa dili saktong interpretasyon sa mensaje sa Ebanghelyo. Si San Pablo, nga anaa sa prisohan niadtong panahona, nakabalita niining maong problema sa taga-Colosas ug tungod niini misulat alang adtong mga komunidad.
Mas daling sabton ang Pulong sa Kinabuhi ning bulana kon basahon kini sulod sa bersikulo diin kini nahisulat: «Sanglit gibanhaw na man kamo uban ni Cristo, tinguhaa ang mga butang nga atua sa langit, diin naglingkod si Cristo, sa iyang trono sa tuo sa Dios. Hunahunaa ang mga butang langitnon, dili ang yutan-on. Kay namatay na kamo, ug ang inyong kinabuhi natago uban ni Cristo diha sa Dios!»1.(Col. 3:1-3)
Aron maundang ang mga panaglalis, si San Pablo miawhag sa pagtugyan sa tibuok hunahuna ug tibuok kaugalingon ngadto sa Nabanhaw nga Kristo. Gani, diha sa Bunyag, namatay na kita ug nabanhaw diha kang Cristo. Mahimong matagamtam na nato “ang hingpit nga katumanan ug ang umaabot pa” ning bag-ong kinabuhi.
“Hunahunaa ang mga butang langitnon, dili ang yutan-on.”
Hinuon, kining posibilidad dili makab-ot dihadiha dayon, kondili paninguhaon ta inubanan sa kakugi sa pagsubay ning dalana latas sa tibuok natong kinabuhi. Sa ato pa, ipataas ang tumong ug panglantaw sa kinabuhi. Si Kristo mao gayod ang nagdala dinhi sa yuta sa kinabuhing langitnon ug ang Pasko sa Pagkabanhaw mao ang sugod sa bag-ong Kabuhatan, sa usa ka bag-ong katawhan. Mao unta kini ang matarong ug hustong dangatan sa tawo nga mipili sa pagpuyo sa Ebanghelyo: usa ka hukom nga hingpit nagbag-o sa tawhanong pangisip, naukay ang mga naandang tamdanan, ang mga laraw ug katuyoan nga gimugna sa kalibotan, daw nalugti ang mga higot ug nakalingkawas na ang tawo sa mga babag ug natagamtam na niya ang dako ug bag-ong kausaban . Kon sutaon ni pag-ayo: si San Pablo wala magpakawalay bili sa “mga yutan-ong butang”, tungod kay niadtong higayona, ang langit mitugkad na sa yuta, pinaagi sa Inkarnasyon sa Anak sa Dios, ug mao kadto nga nabag-o ang tanan2.
“Hunahunaa ang mga butang langitnon, dili ang yutan-on”
«Unsa man kining mga “butang langitnon”?», misulat si Chiara Lubich. «Mao kadtong mga bililhong hiyas nga gidala ni Jesus dinhi sa yuta ug nga mao ang nagpalahi sa Iyang
mga tinun-an. Kini mao ang gugma, panagdait, kalinaw, pasaylo, hustong pamatasan, kaputli, kamatinud-anon, katarong, ug uban pa. Kini mao ang mga birtud ug mga bahandi nga gihatag sa Ebanghelyo. Tungod kanila ug uban kanila ang mga Kristiyanos nagpabilin sa ilang realidad sa pagkabanhaw uban kang Kristo. […]
Apan unsay angay natong buhaton aron ang kasingkasing magpabiling lig-on diha kang Kristo, samtang ania pa kita sa kalibotan? Tugotan ta nga si Jesus maoy mogiya sa atong mga hunahuna ug mga pagbati , kansang mga mata nagasud-ong kanunay sa hilom ngadto sa Amahan ug sa matag gutlo sa Iyang kinabuhi nagsalamin sa mga Balaod sa Langit nga mao ang balaod sa Gugma»3.
“Hunahunaa ang mga butang langitnon, dili ang yutan-on”
Ang presensya sa mga Kristyanos dinhi sa kalibotan way kahadlok nga nag-abli ngadto sa bag-ong kinabuhi sa Pasko sa Pagkabanhaw. Sila mao ang mga babaye ug lalaki nga nag-usab sa kinabuhi; nga wala mapanag-iya sa kalibotan4 apan nagpuyo sila dinhi sa yuta ug nagsagubang sa daghang mga kalisdanan ning atong panahon karon. Mao man kini ang ginaingon mahitungod sa unang mga Kristyanos: «Nagpuyo sila dinhi sa yuta, apan mga lumolupyo sila sa langit. […] Sama nga ang kalag anaa sulod sa lawas, mao usab ang mga Kristyanos sulod ning kalibotana»5.
Pinasikad gayod sa Ebanghelyo ang lig-ong desisyon sa usa ka empleyado nga mihukom pagtabang sa iyang isigkatrabahante nga bag-o lang nataktak sa trabaho. Ang iyang gipakita nga sanglitanan nakatandog sa uban ug nakaagni ug mga buhat-pag-inigsoonay.
«Sulod sa among fabrika, gipang-apod-apod ngadto sa pipila ka mga trabahante ang mga sulat sa pagpapha sa mga empleyado, usa niini nadawat usab ni Jorge. Tungod kay nahibalo ko sa iyang lisod nga kahimtang sa kinabuhi, gidapit ko siya sa pagsulod sa opisina sa mga empleyado: “Mas arang-arang ang akong kahimtang kay sa iyaha – maoy akong gisulti –, anaay trabaho ang akong asawa. Ako na lang ang itaktak ninyo sa trabaho”. Misaad ang among “boss” nga sutaon niya pag-usab ang kaso. Sa dihang migawas na kami sa opisina, si Jorge kahilakon nga migakos kanako. Kining nahitabo dali rang mikaylap ngadto sa uban ug may duha ka empleyado, nga morag sama rag kahimtang nako, mihatag pod sa ilang lugar ngadto sa duha ka trabahanteng napapha sa trabaho. Ang mga tigdumala nakakat-on ug nakapamalandong sa mga paagi kon unsay maayong hukom sa pagtaktak gikan sa trabaho. Sa dihang nahibal-an kini sa among Paroko, gisaysay niya kini sulod sa wali niadtong Domingoha, pero wala maghisgot ug mga ngalan. Pagkaugma dayon nasayran namo nga duha ka estudyante miabot aron paghatag sa ilang tinigom nga kwarta alang sa mga trabahante nga anaa sa kalisod, ug miingon sila: “Buot ming mosunod niadtong gibuhat sa mga empleyado”» (B. S. – Brasile) 6.
~ Gikan ni Patrizia Mazzola uban sa mga kagrupo sa Pulong sa Kinabuhi ~
