“Magbantay kayo” (Marco 13:35). Binabanggit ang pagbabantay sa Mabuting Balita, nang may bigkis sa baywang at nagniningas na mga ilawan. Nangangako ito sa mapagbantay na alipin, na bibigkisan ng Panginoon ang Kanyang sarili sa Kanyang pagdating, at siya’y pagsisilbihan.
Tanging pag-ibig ang mapagbantay. Isang katangian ito ng pag-ibig. Kapag ang sinuman ay umiibig sa isang tao, siya ay nagbabantay at naghihintay sa kanya nang walang tigil. Bawat sandaling lumipas na malayo sa minamahal ay isinasabuhay na kasama siya sa isipan. Ito ay ginugugol sa paghihintay.
Hinihiling ni Hesus ang pag-ibig. Kaya pinakikiusapan Niya tayong magbantay.
Ang sinumang natatakot ay nagbabantay rin. Sa katunayan, binabanggit ni Hesus ang tungkol sa mga magnanakaw. Tayo’y nagbabantay dahil sa tayo’y natatakot, at tayo’y natatakot sapagkat mayroon tayong minamahal na hindi natin nais na mawala.
Hinihingi ni Hesus ang pag-ibig. Ngunit yayamang minamahal din Niya tayo, pinupukaw Niya ang pagkatakot sa atin upang tayo’y iligtas. Kumikilos Siya tulad ng isang ina na nangangako sa kanyang mga anak ng isang gantimpala o parusa na naaayon sa kanilang pagkilos.
Hindi lamang humihiling si Hesus ng dalisay na pagmamahal, na nagbibigay nang hindi nag-iisip ng gantimpala. Para lang tayo makitang ligtas, pinakikita rin Niya sa atin ang gantimpala at ang kaparusahan.
Chiara Lubich
Isinalin ni Msgr. Jose C. Abriol mula sa aklat na “Meditations” ni Chiara Lubich
