Ang Pang-araw-araw Nating Krus
Kapag isinasabuhay natin ang kasalukuyang sandali, at isinasabuhay ito nang mabuti, ating natatanto na lagi nating naisasabuhay ang mga salita ni Hesus, “Pasanin mo ang iyong krus” (Mateo 16:24). Halos lahat ng sandali ay may krus. Lagi tayong sinasamahan sa buhay ng mga maliliit o matitinding espirituwal o pisikal na paghihirap. Kailangan nating ‘pasanin’ ang mga krus na ito, na hindi sinusubukang iwasan sila sa pamamagitan ng pagtakas sa isang buhay na walang pananagutan.
At kahit na tayo’y malusog at masaya, hindi lamang mainam na tayo’y magpasalamat sa Diyos para sa lahat ng ito, kundi mabuhay rin na hindi natatali sa lahat ng ito, na hindi kumakapit sa mga kaloob bagkus, sa Tagapagbigay nito. Kung hindi, makikita natin ang sarili na malungkot at walang saysay.
Sa Kamay ng Diyos
Kadalasa’y pinahihirapan tayo ng pag-iisip kung anong mangyayari sa kinabukasan. Subalit, “Sapat na ang inyong mga suliranin sa bawat araw (Mateo 6:34). Ang bukas ay isa na namang araw, at haharapin natin sa panahong iyon ang mga suliranin ng kinabukasan. Hindi dapat tayo mag-alala; ang lahat ay nasa kamay ng Diyos. Pahihintulutan niya lamang na matupad ang kanyang kalooban at ito’y laging para sa kabutihan natin.
Chiara Lubich
Isinalin ni Jose Aranas mula sa aklat na Here and Now: Meditations on Living in the Present. Manila: New City Press, 2014, pp. 26-27
