Ang Tahanang Tinatayo Natin Dito
Ang buhay ay isang mahalagang pagbabago ng kalagayan: ito ay isang pagsubok! Kung gaano ko pinahihintulutang mabuo sa loob ko si Hesus, itatakda ito magpakailanman sa kabilang buhay. Bawat sandali, bawat kilos at hininga ko ay masasalamin sa buhay na walang hanggan! Bawat minuto ng buhay ko dito sa mundo ay nakakaimpluwensya sa Buhay! “Ang paraiso ay isang tahanan na itinatayo natin dito ngunit tinitirhan sa kabilang buhay.”
Ang Aming Kakanin sa Araw-Araw
“Bigyan mo kami ngayon ng aming kakanin sa araw-araw.” (Mateo 6:11)
Ngayon, gusto Mo talagang mamuhay kami sa paraan Mo, Panginoon! Ngunit sino sa ating mundo ang nabubuhay nang ganito, sa ‘kasalukuyan,’ para lamang sa ‘kasalukuyan’? Sinong hinahabilin ang sarili sa hinaharap tulad ng mga ibong malayang lumilipad na pinapakain Mo’t dinadamitan?
Ginagawang simple ngunit tinatakot din ang ating pagkatao ng pamumuhay para lamang sa ‘kasalukuyan.’ Nais nating magtayo sa isang matatag at ligtas na hinaharap. Gayunpaman, maaaring wala nang bukas…
Panginoon, nais Mo kaming maging mapagbantay. Ipinapahayag Mo ang isang kaharian kung saan kami ay tatawagin sa araw at oras na hindi namin alam. Tama ka, at hindi Mo maaaring salungatin ang Iyong sarili.
Kaya’t bigyan Mo kami ng biyaya na mamuhay nang maayos sa natitirang bahagi ng aming buhay sa bawat araw na ibinibigay Mo sa amin.
Chiara Lubich
Isinalin ni Jose Aranas at Jonas Lardizabal mula sa aklat na Here and Now: Meditations on Living in the Present. Manila: New City Press, 2014, pp. 60, 62.