Hapit na moabot si Jesus sa Betania, ug didto si Lazaro,upat na ka adlaw nga namatay. Sa pagkabalita sa iyang igsoon nga si Marta, nga taliabot na si Jesus migula siya aron pagsugat kaniya, puno sa paglaum. Suod si Jesus ni Marta, ni Maria nga iyang igsoon ug ni Lazaro, sumala sa gipamatuod sa Ebanghelyo1. Bisan sa dakong kaguol, si Marta mitugyan sa Ginoo sa dakong pagsalig ngadto kaniya, kay dako ang iyang pagtuo nga kon didto pa lamang niadtong adlawa si Jesus, buhi pa unta ang iyang igsoon, apan bisan karon nasayod siya nga mohatag Kaniya ang Dios bisag unsay iyang pangayoon. Mabanhaw ang imong igsoon (Jn 11: 23), miingon dayon si Jesus.

“Mituo ka ba niini?”

Human nga gipatin-aw niya nga mobalik si Lazaro sa iyang tawhanong lawas, karon dayon ug dili lamang kadtong taliabot sa magtutuo human sa kamatayon, gipangayo ni Jesus kang Maria ang tim-os nga pagtuo apan dili lamang aron isaksi ang usa sa iyang mga milagro – nga sumala sa Ebangelyo ni San Juan gimugna kini isip “timailhan” – kondili ang paghatag kang Maria, ug ngadto usab sa tanang mga magtutuo, ug usa ka bag-ong kinabuhi ug ang pagkabanhaw. Ako ang Pagkabanhaw ug ang Kinabuhi (Jn 11: 25), miingon si Jesus. Ug ang pagtuo nga gipangayo niya mao ang personal nga pagpakig-uban Kaniya, usa  ka aktibo ug mabungahong pakigsuod. Ang pagtuo dili sama sa pagdawat ug kontrato diin sa dihang nakapirma ka na  dili ka na magpakabanâ bahin niana, kondili usa kini ka panghitabo nga makausab sa tawo ug motuhop kini sa adlawadlaw niyang kinabuhi.

“Mituo ka ba niini?”

Gidapit kita ni Jesus sa pagpuyo ug bag-ong kinabuhi karon dayon. Gidapit kita sa pagtagamtam niini matag adlaw, tungod kay nasayod kita, sumala sa atong nakaplagan sa Pasko, si Jesus mismo maoy nagdala niini kanato, maoy nag-una sa pagpangita kanato ug mianhi siya sa kalibotan.

Unsaon pagtubag sa iyang gipangayo? Tan-awon ta si  Marta, ang igsoon ni Lazaro.

Diha sa iyang pakigkokabildo kang Jesus misulpot gikan kaniya ang usa ka deklarasyon sa pagtuo ngadto kaniya. Ang original nga pinulongang Greco mas labaw pang mipalawom niini. Ang paglitok “mituo ako” sa pagdeklarar ni Marta nagpasabot nga “mituo na gayod ako”, “hugot akong mituo” nga   Ikaw si Cristo, ang Anak sa Dios,nga moanhi sa kalibotan 2,  lakip na ang tanan nga mahitabo tungod niini. Usa kini ka dakong pagsalig nga mitubo ug milambo sulod sa dugayng panahon, nga naangkon niya taliwala sa daghang  mga pagsulay nga gisagubang sa iyang kinabuhi.

Sulod sa akong kaugalingon, gipangutana usab ako sa Dios. Gikan kanako gipangayo usab niya ang manggihatagong pagsalig ngadto kaniya, ang tiunay nga pagsunod sa iyang estilo sa kinabuhi, pinasikad sa usa ka gugmang manggihatagon ug maalagaron ngadto sa tanan. Ang maantuson nga pag-alagad maoy mopatubo sa akong pagtuo, ug malig-on kini diha sa adlawadlawng pagsaksi sa kamatuoran sa mga Pulong sa Dios,  diha sa pagtuman niini sa adlawadlawng kinabuhi, ug dili gayod magmakulang sa pagsaksi niini diha sa adlawadlaw nakong pag-alagad ngadto sa tanan. Samtang buhi pa, angkonon nato ang pag-ampo nga gilitok sa mga apostoles ngadto kang Jesus: Dugangi ang among pagtuo (Luc 17: 6).

“Mituo ka ba niini?”

Ang akong anak nga babaye nawagtangag trabaho apil pod ang iyang mga kauban, tungod kay gipaserado sa Gobyerno kining ilang lugar-trabahoan, misaysay si Patricia, nga taga South America.

Isip pamaagi sa protesta, nagkasinabot silang tanan sa pag-kamping atubangan sa opisina sa pamahalaan. Naningkamot ko nga matabangan sila ug mikuyog ko sa uban nilang mga aktibidad, gidalhan ko silag pagkaon ug gani mihunong ko sa makadiyot aron makig-istorya uban kanila.

Huwebes Santo kadto, ug ang grupo sa mga kaparian nga miuban kanila nagkauyon  sa pagsaulog ug mga seremonyas diin aduna pod silay mga takna sa pagpakigkokabildo, gibasa namo ang Ebangelyo, ug gipakita nila ang akto ni Jesus sa paghugas sa mga tiil, sama sa gisaksi ni Jesus. Kadaghanan niadtong mga tawhana walay ginasunod nga tinuohan. Apan nahimo hinuon kining takna sa usa ka halawom nga pakighiusa, panag-inigsoonay ug paglaum. Nabati nila ang gakos sa Ginoo ug, natandog sila, gipasalamatan nila ang mga kaparian nga mikuyog kanila diha sa ilang  kaway-kaseguradohan, diha sa ilang kaguol.

Kining Puong sa Dios maoy gipili isip giya sa Semana sa Pag-ampo alang sa Panaghiusa sa mga Kristiyanos sa tuig 2025. Mag-ampo kita karon ug molihok kita aron kining atong hiniusang pagtuo maoy modasig kanato sa pagpanlimbasog sa panag-inigsoonay sa tanang katawhan: mao kini ang tinguha ug  pangandoy sa Dios alang sa katawhan, apan nagkinahanglan usab kini sa atong pakig-uyon. Ang pag-ampo ug ang pagsaksi magmabungahon lamang kon pinasikad kini sa atong pagsalig sa Dios nga morisulta diha sa atong mga buhat.

Gikan ni Silvano Malini ug mga kagrupo sa Pulong sa Kinabuhi

1 Gv 11, 5.

2 Cf. Gv 11, 27.