“Maghatag ako kaninyog bag-ong sugo: paghigugmaay kamo.” (Jn. 13:34)
Ania ta sa takna sa kataposang panihapon. Si Jesus nanihapon uban sa iyang mga tinun-an, human nga gihugasan Niya ang ilang mga tiil. Sa dili madugay dakpon si Jesus, pagasilotan sa kamatayon, ug ilansang sa Krus. Kon mubô na ang panahon ug duol na ang gipadulngan, maoy isulti nato ang mga mahinungdanong butang: maoy ibilin nato ang usa ka “testamento”.
Mahitungod niini, diha sa ebanghelyo ni San Juan, wala isaysay ang bahin sa’pagtukod sa Eukarestiya. Mabasa hinuon nato nga gihugasan ni Jesus ang tiil sa iyang mga tinun-an. Subay niining gipadayag, angay natong sabton ang Bag-ong Sugo . Una sa tanan, si Jesus misaksi sa Iyang mga buhat ug unya nagtudlo ug tungod niini ang Iyang mga pulong may awtoridad.
Ang sugo sa paghigugmaay gihisgotan na sulod sa Daang Kasabotan: “Higugmaa ang inyong isigkatawo ingon sa inyong paghigugma sa inyong kaugalingon” (Lev 19:18). Apan gipahimug-atan ni Jesus ang usa ka bag-ong hiyas, ang pagtinagdanay ug paghinatagay: matukod ang usa ka komunidad sa mga sumosunod ni Kristo kon may paghigugmaay sa usagusa.
Nagagikan ang gamot niini diha sa kinabuhi mismo sa Santisima Trinidad, diha sa Diosnong relasyon mismo sa tulo ka Dios-Persona diin ang tawo makaambit usab pinaagi sa grasya nga gibubo sulod kanato sa Dios-Anak. Si Chiara Lubich mihatag ug usa ka pasumbingay bahin niini, diin gihatagan ta niyag imagen aron malamdagan kita: «Sa pag-anhi ni Jesus dinhi sa yuta dili kay gikan siya sa wala, sama sa pagkahimugso sa usagusa kanato; hinuon, miabot siya gikan sa Langit. Ug sama ra sa usa ka langyaw, kon moadtog laing dapit, sigurado gayod nga mounong sa bag-ong kalikopan, apan magdala usab sa naandan ug kaugalingong mga binuhatan ug kasagaran magpadayon sa paggamit sa naandang pinulongan; mao usab kini ang gibuhat ni Jesus dinhi sa kalibotan, nakighugoyhugoy Siya sa kinabuhi sa tawo, apan may gidala usab dinhi sa kalibotan- tungod kay Dios man Siya – ang paagi sa pagkinabuhi sa Santisima Trinidad nga mao ang Gugma, ang paghigugmaay sa usagusa»[1].
“Maghatag ako kaninyog bag-ong sugo: paghigugmaay kamo.”
Nakasulod na kita sa kinauyokan sa mensaje ni Jesus, nga nagpabalik kanato sa pagkalab-as sa unang mga Kristohanong katilingban, nga gihapon hangtod karong mga panahona mahimong timailhan nga tataw kaayo dinha sa atong mga grupo ug mga kapunongan. Diha sa mga lugar diin ang pagtinagdanay ug paghinatagay masaksihan sa tanan, matagamtam nato nga may kapuslanan ang kinabuhi, mabatonan nato ang kaisog sa pagpadayon ning kinabuhia bisan sa mga takna sa kaguol ug mga pag-antos, daw may nagpugong ug naghatag natog kalig-on taliwala sa mga kalisdanan nga di-kalikayan, matagamtam nato ang kahupayan.
Daghan ang mga pagsulay nga giatubang nato matag adlaw: ang pandemic, ang pagdumtanay, ang kapobre, ang mga panagbingkil. Apan bisag sa makadiyot lamang, ihulagway ta sa atong hunahuna unsa kaha ang mahitabo, kon unta kitang tanan makabansaybansay ning mga Pulong sa Ginoo matag adlaw sa atong kinabuhi? Mabag-o gayod ang panglantaw sa atong mga mata, mabukhad gayod sa atong atubangan ang plano sa Dios alang sa tawo, katuyoan nga modalag paglaum. Apan kinsay mobabag kanato sa pagkahigmata atubangan ning Kinabuhia? Nga unta mabuhi ang mga relasyon ug pagtinagdanay uban sa tanang nag-alirong kanato ang pag-inigsoonay, ug nga unta mokalat kini sa tibuok kalibotan?
“Maghatag ako kaninyog bag-ong sugo: paghigugmaay kamo.”
Si Marta usa ka batan-ong volunteer nga nagatudlo sa mga piniriso aron maandam niya sila sa pagpasar sa examen sa unibersidad. “Sa una pa nakong pagsulod sa prisohan, nahimamat nako ang mga tawo nga puno sa kahadlok ug kawalay kabangkaagan. Gipaningkamotan nako nga ang among pagtinagdanay may pagtahod kanako nga ilang maestra, ug nga mahimo unta ko nilang amiga, nga may pagtahod unta ug mahibalong maminaw sa usagusa. Nasabtan dayon nako nga dili lamang kay ako ra ang nagtabang sa piniriso; sila usab ang naghatag kanakog kaisog.. Dihay usa ka higayon nga, samtang gitabangan nako ang usa ka estudyante sa pag-andam alang sa examen, nawad-an kog usa ka sakop sa akong pamilya; mientras, kining tawhana usab nakadawat ug kasayoran nga gisentensiyahan na siya sa Korte. Kaming duha nagtago’g tumang kasubo. Samtang nagtudlo ako kaniya nabati nako ang giluom niyang kasubo, ug sa tumang pagsalig gibutyag niya kini kanako. Nakigtambayayong ako kaniya niining bug-at nga kasubo, ug nakatabang kini kaniya sa pagpadayon sa pagtuon. Sa dihang nahuman na niya ang examen, mibalik siya aron pagpasalamat kanako, miingon siya nga kon wala pa ko magpabilin sa iyang kiliran kawad-an unta siyag paglaum. Samtang sa laing bahin may usa ka kinabuhi nga nakalas sa akong pamilya, sa laing bahin usab nabati nako nga nakaluwas kog usa ka kinabuhi. Nasabtan nako nga diha sa pagtinagdanay ug paghinatagay mabungat ang tiunay nga mga relasyon, mga tinuod nga amigo ug pagtahod sa usagusa”[2].
Letizia Magri
[1] C. Lubich, Maria trasparenza di Dio, Città Nuova, Roma 2003, pp. 72-73.
[2] Cf. http://www.unitedworldproject.org/workshop/unesperienza-al-di-la-delle-sbarre-relazioni-di-cura-reciproca/.
