Gitugyan dinhi sa Ebanghelyo ni San Marcos ang mga pulong panamilit ni Kristo nga Nabanhaw niadtong talagsaong takna nga nagpakita siya sa iyang mga Apostoles.Nanglingkod sila sa kan-anan, diin kasagaran nasaksihan nato sila uban kang Jesus bisan gani sa wala pa magsugod ang iyang pagpasakit ug kamatayon, apan niining higayona kining gamay nga komunidad nagdalag timaan sa kapildehan: napulog-usa na lamang ang nahibilin, imbes nga doce unta silang gipili ni Jesus alang Kaniya, apan sa takna sa pagbitay sa Krus, usa sa iyang mga sakop milimod ug mibiya kaniya, ug daghan ang midagan ug mipahilayo.Niining kataposan, ug pinakamahinungdanong pakigtagbo, gikasab-an sila sa nabanhaw nga Kristo ug mibadlong kanila tungod kay gisirad-an nila ang ilang mga kasingkasing atubangan sa iyang mga pulong nga gisaksi Niya diha sa Iyang pagkabanhaw, apan sa mao gihapon nga okasyon, gikompermahan niya ang iyang pagpili kanila: bisag tataw kaayo ang ilang kahuyang, gisubli na usab niya ngadto kanila ang tugon sa pagsangyaw sa Ebanghelyo, kadtong Maayong Balita nga Siya mao mismo, diha sa iyang kinabuhi ug sa Iyang mga pulong.Human niining balaan ug makahuloganong pakigpulong, si Kristo nga nabanhaw mibalik ngadto sa Amahan, apan sa samang higayon “nagpabilin Siya” uban sa iyang mga tinun-an, mikomperma sa ilang mga pulong pinaagi sa katingalahang mga timailhan.
“Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo”.
Ang komunidad nga gipadala ni Jesus aron magpadayon sa mao mismong Misyon dili diay usa ka hugpong sa mga tawong hingpit na; hinuon, mga tawo kini nga gitawag Niya una sa tanan aron “pagpabilin” uban Kaniya, aron makasinati sa Iyang presensiya ug sa Iyang gugma puno sa pasiyensya ug kalooy. Ug unya, tungod sa kalig-on ning maong kasinatian, giawhag sila Niya “sa pagsangyaw ngadto sa tanang mga tawo” kon unsa kaduol ra gayod sa Dios.Ug ang pagkamabungahon sa Misyon wala gayod mag-agad sa personal nga mga hiyas, kondili tungod sa presensiya ni Kristo nga nabanhaw nga nagtugyan sa Iyang kaugalingon ngadto sa iyang mga tinun-an ug ngadto sa komunidad sa mga magtutuo, ug dinha kanila motubo ug molambo ang Ebanghelyo dipende kon gipuy-an ug gisangyaw nila kini.Nan, unsay mahimo nato isip mga Kristiyano: isinggit nato pinaagi sa kinabuhi ug sa mga pulong ang gugma sa Dios, kalimtan nato ang atong kaugalingon ug mogawas tang maisogon ug sa walay pag-ukon-ukon, aron mapaambit nato sa tanan, uban sa pagkamaampingon ug pagtahod, ang mga bahandi ni Kristo nga Nabanhaw aron ablihon ang mga kasingkasing ug pun-on sa paglaum .
“Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo”.
Ang buot ipasabot niini mao nga isaksi nato kanunay si Jesus ug dili ang atong kaugalingon; sa tinuoray, gidapit ta “sa paglimod” sa atong kaugalingon, sa “pagpakagamay” aron Siya motubo. Kinahanglan nga hawanan ang atong kasingkasing ug tagaag luna ang gahom sa Espirito, nga nagtukmod kanato sa pag-inigsoonay: «[…] Angay gayod nako sundon ang Espirito Santo nga, sa matag higayon nga makatagbo ko sa mga kaigsoonan, moandam nako sa “pakighugoyhugoy”, diha sa matarong ug maayo nga pag-alagad sa akong isigkatawo; nga naghatag kanako ug kusog sa paghigugma kanila kon ugaling mga kaaway nako sila; ug hupngon unta Niya ang akong kasingkasing sa kalooy alang kanila aron ako makapasaylo ug masabtan ko ang ilang mga panginahanglan; nga modasig kanako sa pag-ingon, kon moabot ang hustong panahon, nga makaistorya ko bahin sa mga matahom nga kasinatian sa akong kalag […] Tungod sa akong gugma ug sa gugma ni Jesus nga gipadayag ug gipaambit. […] Pinaagi ug tungod niining gugma sa Dios sulod sa akong kasingkasing makaabot kinig halayo, ug daghan pang mga tawo ang makaambit niining akong mga nadeskobrehan […] hangtod nga ang akong isigkatawo, nga sa hinayhinay natandog sa gugma sa Dios gikan kanako, buot usab “makighugoyhugoy” kuyog kanato, ug magtinabangay sa usagusa makig-ambit sa mga hataas nga panig-ingnan, mga laraw, mga gipangandoy nga kaayohan. Nianang mga adlawa, makapaambit na kita pinaagi sa pulong, ug mahimo kining gasa, tungod kay may gugma ug pagtahod na sa usagusa».
“Panglakaw kamo sa tibuok kalibotan ug isangyaw kining Maayong Balita ngadto sa tanang mga tawo”.
“Ngadto sa tanang mga tawo”: usa ka panglantaw nga nagpukaw kanato nga dungan ug sakop ra ta sa usa ka dakong mosaico sa mga Binuhat sa Dios ug niining mga panahona nataligam-an nato kini. Kasagaran, mga batan-on ang nag-una sa paglakat niining bag-ong dalan nga gipadulngan sa mga katawhan sa kalibotan; sumala sa estilo sa Ebanghelyo, gikomperma nila pinaagi sa mga kalihokan ang ilang gisangyaw pinaagi sa mga pulong.Si Robert, taga – New Zealand, mipaambit sa iyang kasinatian pinaagi sa internet: «Usa ka kalihokan nga nagpadayon diri sa among teritoryo mao ang pag-ayo sa dunggoanan sa Porirua didto sa Wellington, New Zealand. Sa among pagpasiugda niini amo usab nga gipatabang ang mga opisyal sa baranggay, ang komunidad sa Maori nga Catoliko ug ang mga lumad. Ang among tinguha mao ang pakighugoyhugoy niining tribu sa mga Maori tungod kay buot nilang ipaayo ang baybayon ug dunggoanan, bantayan nga ang dagat kanunay malimpiyohan aron dili na kahadlokan ang kahugaw sa pagpanginhas ug pagpanagat adlawadlaw. Kining among kalihokan gikalipay gayod sa tanan ug nakabungat kini ug katilingbanong espiritu sa kahiusahan.Gipaninguha namo nga kadtong kalihokan dili unta kutob lang niadtong adlawa, gipadayon namo kini ug naghimo mig program nga molungtad ug dugay ang mga nagsuporta ug nagtabang niining maong proyekto aron sa ingon niini makasaksi ug kausaban dinhi niining natad sa katilingban » .
Letizia Magri
_____________________________________
1 Cf Mc 16, 9-1
2 Cf Mc 3, 14-15
3 Cf Concilio Vaticano II, Costituzione dogmatica sulla Divina Rivelazione Dei Verbum, n. 8
4 C. Lubich, Parola di Vita giugno 2003, in eadem, Parole di Vita, a cura di Fabio Ciardi (Opere di Chiara Lubich 5; Città Nuova, Roma 2017) pp. 691-692.
5 Il testo integrale di questa e di altre esperienze è disponibile, in varie lingue, sul sito http://www.unitedworldproject.org/workshop
