Ang Gingharian sa Dios mao ang kinauyokan sa mensahe ni Jesukristo. Ug mao kini ang Maayong Balita nga buot imantala sa ebanghelyo ni San Marcos. Gipadayag kini pinaagi sa hamubo nga sambingay diin gihulagway ang binhi nga gisabod ngadto sa yuta ug sa kalit lang mabuhi, moturok ug molambo; ug unya mogawas ang mga bunga.
Apan unsa man ang Gingharian sa Dios alang kanato, karong mga panahona? Unsa may kalabotan niini sa atong kaugalingong sugilanon ug sa kasaysayan sa tawo, nga sa kanunay daw nagalutaw sa hangin tungod sa iyang mga gilauman ug unya nahugno sa mga kapakyasan? Kon ang maong mga binhi gisabod na dinhi sa yuta ngano man nga dili nato makit-an ang mga bunga sa kalinaw, sa kasiguradohan, ug sa kalipay?
“Ang gingharian sa Dios sama sa usa ka tawo nga nagsabod ug binhi ngadto sa yuta. Ug natulog ug nagtukaw gabii ug adlaw, ug ang binhi miturok ug mitubo sa paagi nga wala niya mahibaloi”
Kining Pulong sa Kinabuhi nagtudlo kanato bahin sa hingpit nga pagsalig ni Kristo mismo mahitungod sa plano sa Dios alang sa sa tanang katawhan.
“[…] Alang kang Jesukristo nga mianhi na sa kalibotan, tungod sa iyang kadaugan, ang Gingharian sa Dios ania na dinhi sa yuta, ug ang katumanan niini, nga mao ang kataposan sa kasaysayan sa tawo, makab-ot na gayod nato. Ang Simbahan mao ang katilingban nga nagatuo sa maong Gingharian, ug kini Siya mao ang sinugdanan”.
Alang sa tanan nga midawat Kaniya, gitugyan ang tahas sa pag-andam sa yuta aron sa pagdawat sa maong gasa sa Dios ug magbaton sa paglaum diha sa Iyang gugma.
“[…] Sa tinuoray walay panlimbasog sa tawo, pagpaninguha sa pagdili sa kaugalingon, walay pagtuon ug pakisayod ug kaantigo sa tawo , nga makapasulod kanimo sa Gingharian sa Dios. Ang Dios mismo maoy mohimamat kanimo, ug mopadayag sa Iyang kaugalingon pinaagi sa Iyang kahayag o hinuon, motandog kanimo pinaagi sa iyang grasya. Ug walay makapasigarbo nga angayan siyang makadawat ug ganti ug walay makasalig nga may katungod sa pagdawat sa maong gasa sa Dios. Ang Gingharian sa Dios gihatag kanimo sa walay bayad”.
“Ang gingharian sa Dios sama sa usa ka tawo nga nagsabod ug binhi ngadto sa yuta. Ug natulog ug nagtukaw gabii ug adlaw, ug ang binhi miturok ug mitubo sa paagi nga wala niya mahibaloi”
Isabod mo ang mga binhi: ayaw pugngi diha sa imong mga kamot, hinuon isabwag mo kini kutob sa mahimo inubanan sa dakong pagsalig, “gabii man o adlaw”: ang gingharian sa Dios moturok ra sa kahilom, bisan gani diha sa kangitngit sa kaugalingon mong kagabhion. Ug makapangayo ta matag adlaw: “Umabot kanamo ang Imong Gingharian”.
Ang binhi wala magkinahanglan sa masubsob nga pag-atiman sa maapupugas, giawhag hinuon kita sa pagbaton ug kaantigo sa paghulat, inubanan sa pailob ug pagkamainantuson, ug ayaw kabalaka sa dagan sa panahon. Nagtudlo kanato unsaon pagsabot sa arte sa pagpakig-uban inubanan sa pailob ug pagkamainantoson tungod kay ang binhi molambo ra sa iyang panahon, ug dili kinahanglan nga mabalaka ta kon unsay mahitabo; matagamtam nato ang kagawasan sa pagdawat sa uban sa matag takna sa atong kinabuhi, hatagan natog bili ang iyang mga tinagong hiyas diha sa pagtahod sa iyang panahon.
“[…] Usa ka bulan na lang nga mahitabo na ang ilang kasal, ang among anak nga lalaki mitelefono aron pagsulti kanamo nga ang iyang pangasaw-onon mibalik na usab sa pagsuyop ug droga. Nangayo namog tambag unsay angay niyang buhaton.Wala dayon ko makatingog. Mahimo pod nga dakpon namo ang higayon aron madani namo siya sa pagbiya ning bayhana, apan alang kanamo morag dili kadto mao ang solusyon.
Mao nga misugyot kami kaniya sa pagsusi sa iyang kasingkasing[…] Hilom ug nadugay siya pagtubag, ug unya miingon: “Tingali angay dugangan pa nako ang akong pagpangga kaniya. ”. Human sa kasal, nakakaplag sila ug usa ka maayong Centro alang sa mga tawong gustong magbag-o ug mobiya na sa droga. Milabay ang katorce ka bulan, ug sulod niining mga panahona nakalahutay siya sa iyang gisaad nga “dili na gayod mogamit ug droga”
Alang sa tanan hataas gayod ang panahon sa pagpasensya, apan tungod sa gugma nga nasabtan namo sa ebanghelyo ug gibansaybansay namong magtiayon – bisag daghan ang naagas nga mga luha – naghatag namo kaisog sa pagpangga sa among anak niadtong iyang sitwasyon nga delikado gayod kaayo.
Ang among gugma, tingali makatabang sa among anak sa pagsabot kon unsaon niya pagmahal ang iyang asawa”.
Gikan ni Letizia Magri ug mga kagrupo sa Pulong sa Kinabuhi
