Talagsa-on ang sulat ni San Pablo apostol sa mga Kristyanos sa Roma, ilabina sa iyang mga pagtulon-an. Naghisgot siya bahin sa pagkagamhanan sa Ebangelyo para sa kinabuhi sa matag tawo nga modawat niini, naghisgot usab siya bahin sa kabag-ohan nga mahitabo gumikan aning pagtulon-an: ang gugma sa Dios molugti sa tanang gapos!
Nasinati ni San Pablo kining nahisgotang pagtulon-an ug buot niyang isaksi, pinaagi sa pulong ug sa buhat. Kining iyang pagkamaunungon sa tawag sa Dios maoy makadala kaniya sa Roma, diin gitugyan niya sa Dios ang iyang kinabuhi .
“Kinsay makapahimulag kanato sa gugma ni Kristo?”
Dili pa dugay nga miingon si San Pablo: «Ang Dios anaa para kanato». Si Pablo, mituo nga ang gugma sa Dios sama sa gugma sa usa ka bana nga maunongon; dili mobiya sa iyang kapikas, kinsa – gawasnon – niyang gipili. Silang duha gibugkos sa di-mabugto nga gapos; para sa kapikas gitugyan niya ang iyang kinabuhi.
Ang Ginoo, dili usa ka maghuhukom; apan Iya hinuong giangkon ang pagpanagang kanato. Mao kini ang hinungdan nganong walay butang nga makapahimulag Niya kanato; pinaagi sa pagpakigtagbo kang Jesus, ang pinalanggang Anak sa Amahan.
Walay kalisdanan, dagko man o gagmay, sulod o gawas sa atong kaugalingon, nga makababag sa gugma sa Dios. Hinuon, miingon si San Pablo, kadtong modangop ug mosalig sa Ginoo sa ingon niining kahimtang, misalig Kaniya kinsa miingon <<ayaw kamo’g kahadlok kay gidaug ko na ang kalibotan>> (Jn 16:33).
Niining panahona sa “super-man” o “super-bayani” kinsa naghari-hari pinaagi sa garbo ug gahom gikan sa pagpamugos, ang sugyot sa Ebangelyo hinoon, mao ang kalumo, ug ang matinahurong pagdawat sa pangatarongan ug panglantaw sa isigkatawo.
“Kinsay makapahimulag kanato sa gugma ni Kristo?”
Aron masabtan ug mapuy-an nato’g tarong ang Pulong sa Kinabuhi karong bulana, makatabang ang gisugyot ni Chiara Lubich: kini ang iyang gipaambit: «Tinuod, mituo ta; gani, makaingon ta nga buot tang motuo sa gugma sa Dios. Apan, hilabihan kadaghan ang mga higayon, […] nga dili lig-on ang atong pagtuo, wala tay igong kaisog […] ilabina sa takna sa mga pagsulay, sama pananglit sa pagdagsa sa mga balatian sa lawas o sa mga tentasyon. Dali ra tang mo atras, o malumos sa duda: «Tinuod ba kaha nga gihigugma ko sa Ginoo?». Ayaw! dili kita angay magduha-duha! Kinahanglan gayod nga itugyan nato ang atong kaugalingon ug mosalig ta sawaypag-ukon-ukon, sa Gugma sa Amahan. Kinahanglan buntogon nato ang kangitngit ug kahaw-ang nga atong mabati pinaagi sa pagdawat ug paggakos sa Krus. Unya sugod dayon sa paghigugma sa Dios pinaagi sa pagtuman sa Iyang kabubut-on, ug diha sa paghigugma sa atong isigkatawo. Kon, uban ni Jesus, himoon nato ni, matagamtam nato ang pagkagamhanan ug kasadya sa pagkabanhaw. Masinati nato nga tinuod gayod nga, kinsa kadtong motuo ug mosalig sa iyang Gugma, mabag-o ang tanan: ang negatibo mahimong positibo; ang kamatayon mahimong tubod sa kinabuhi; ug gikan sa kangitngit mobidlisiw ang usa ka katingalahang kahayag
“Kinsay makapahimulag kanato sa gugma ni Kristo?”
Bisan taliwala sa masulob-ong mga hitabo sa guerra (gubat), sila nga wala mohunong sa pagsalig sa Gugma sa Dios, makapahuros ug hangin sa kaayohan ug katarungan. Dinhi sa Balkans; ang among nasod, nahiagom sa usa ka away sa armas. Ang mga sundalo nga nahiapil didto sa unang tropa nga miasdang sa kaaway, miuban sa among batalyon. Kini sila, may mga mapintas nga kasinatian nga di nila makalimtan, ila lang giluom. Nasaksihan nila ang kamatayon sa ilang mga ginikanan, mga paryente ug mga amigo…. Wala koy mahimo kondili sa paghigugma sa tagsatagsa kanila, kutob sa akong mahimo. Sa mga higayon nga walay encuentro; maninguha ko’g pakig-istorya kanila mahitungod sa mga giluom nga gibati nila. Kasagaran kining pakig-estorya misangko paghisgot bahin sa Ginoo, bisa’g daghan kanila wala na’y pagtuo. Usa niana ka higayon nga naminaw ko nila, nakasugyot ko sa pag-imbitar ug Pari aron mosaulog sa Santos nga Misa. Ang tanan miuyon ug ang pipila kanila mikompisal, bisag kawhaan na ka tuig ang milabay sa kataposang kompisal. Nakaingon ko nga ang Ginoo mitungha gayod ug miuban kanamo adtong tungora!».
