Ito ang malaking pang-akit ngayon:
ang maabot ang pinakamataas na pagninilay
samantalang nakikibahagi sa buhay ng bawat tao,
bilang isa sa karamihan.
Makapagsasabi ako nang higit pa:
ang isama ang sarili sa madla
upang ang Diyos ay makalagos dito,
tulad ng alak na tumatagos
sa isang pirasong tinapay.
Makapagsasabi ako nang mas higit pa:
bilang mga kabahagi sa mga plano ng Diyos
para sa sangkatauhan,
ang maglagay ng mga pamantayan ng liwanag sa madla,
nakikibahagi sa kahihiyan, kagutuman, mga ligalig
at maiikling kasiyahan ng ating kapwa.
Ang pang-akit ngayon, tulad sa lahat ng panahon,
ay si Hesus at si Maria:
ang pinakamataas na mailalarawang pagpapahayag ng tao at ng Diyos.
Ang Kataga ng Diyos, isang anak ng karpintero;
Ang Luklukan ng Karunugan, isang ina sa tahanan.
Chiara Lubich
Isinalin ni Msgr. Jose C. Abriol