Mao kini ang gisaysay mahitungod sa pagpahibalo sa Anghel ngadto kang Maria. Ang Arkanghel Gabriel miadto kang Maria nga taga-Nazaret aron pagpadayag  sa plano sa Diyos alang kaniya: Magmabdos siya ug manganak ug lalaki, nganlan siyag Jesus, ug “mahimo siyang inila ug tawgon siya nga Anak sa Dios nga Labing Halangdon”.

Kining nahitabo giisip nga sumpay sa ubang mga sugilanon sa Karaang Kasulatan mahitungod sa mga babayeng dili makapanganak o tigulang na, ug unya, midangat ngadto sa milagrosong pagpanganak  ug ang ilang mga anak gitagna nga adunay tahas nga makahuloganon sulod sa dagan sa kasaysayan.

Ning tungora, si Maria, bisan gusto kining mahitabo kaniya, diha sa hingpit nga kagawasan, miuyon sa misyon nga mahimo siyang Inahan sa Manunubos, apan nangutana sa anghel kon unsaon man pagkahitabo sa iyang gisulti tungod kay ulay man siya? Ang anghel Gabriel mipasalig nga dili kini buhat sa tawo:   “Mokunsad kanimo ang Espiritu Santo ug magpabilin ang gahom sa Dios diha kanimo “. Ug midugang pag-ingon: “ … kay walay dili mahimo sa Dios” .

“kay walay dili mahimo sa Dios”.

Kining pagpasalig, diin buot ipasabot nga  walay gimugna ni saad sa  Dios nga magpabiling walay katumanan– tungod kay walay butang nga imposible sa Dios – mahimo usab nga ipaklaro niining paagiha: walay butang nga imposible uban sa Dios. Gani, ang gamayng tudling sa basahong griyego “kuyog, o duol, o uban sa Dios”, nagpatin-aw ug samot unsa Siya kahaduol sa tawo. Para sa tawo o alang sa tanang katawhan, kon makigsuod o makig-uban sila sa Dios ug gawasnon nga motuman sa iyang kabubut-on, walay butang nga imposible.

“kay walay dili mahimo sa Dios”.

Unsaon pagpuyo ning Pulong sa Kinabuhi? Una sa tanan, motuo diha sa tumang pagsalig nga ang Dios makahimo bisan unsang butanga  sulod  sa kinabuhi sa tawo o lampas pa gani sa iyang mga kasaypanan ug kahuyang, bisan gani diha sa mangitngit nga mga sitwasyon sa kinabuhi.

Mao kadto ang kasinatian ni Dietrich Bonhoeffer nga samtang gipriso siya, gilutos ug gipaantos pag-ayo, misulat: “Angay gayod nga mopailawom ug magpa-ubos ta kanunay  sa pagpuyo, pagsulti, paglihok, pag-antos ug pagkamatay diha ni Cristo aron mailhan nato kon unsa ang gisaad sa Dios ug unsay iyang mahimo alang kanato.

Ug sigurado gayod […] nga alang kanato walay butang nga imposible, kay walay butang nga dili mahimo sa Dios  alang kanato ; […] hinuon, wala ko moingon nga anaa kitay giapas nga buhaton Niya alang kanato ug nga maangkon ang gusto nato gikan Kaniya; sigurado ta nga luyo sa kasakit nagtago ang kalipay ug diha sa kamatayon nagpaluyo ang kinabuhi…Atubangan niining tanan ang Dios miingon “Oo” ug “Amen” diha ni Cristo.  Kining “Oo” ug kining “Amen” mao ang malig-on nga yuta diin angay natong barogan” .

“kay walay dili mahimo sa Dios”.

Sa pagpaningkamot nga mabuntog nato ang tataw kaayo nga“imposible” tungod sa atong mga kahuyang, aron makab-ot nato ang“posible” sa usa ka kinabuhing sulondon ug matarong, ang pinakaimportanteng papel mabuhat lamang sa usa ka komunidad nga nagkatigom; ug magmalamboon kini diin ang mga tinun-an, kon puy-an sa isigkasakop ang bag-ong sugo ni Jesus mohatag luna sa gahom ni Kristo nga Nabanhaw, diha sa matag usa ug taliwala sa panagtigom.

Misulat si Chiara Lubich niadtong 1948 ngadto sa usa ka grupo sa mga batan-ong pari : “Sige padayon ta! Dili uban sa atong kusog, nga walay umoy ug huyang, kondili  uban sa gahom sa panaghiusa. Nasayran na nako, nahikap sa akong mga kamot nga ang Dios uban kanato makahimo sa imposible: sa Milagro! Kon magpabilin tang matinud-anon sa gipiyal Niya kanato […] ang kalibotan makasaksi sa panaghiusa ug apil usab niini ang katumanan sa Gingharian sa Dios” .

Pipila ka tuig na nga milabay, didto pa ko nagpuyo sa Africa, kanunay akong nakigtagbo ug mga kabatan-onan nga buot magpuyo isip mga Kristiyanos . Misaysay sila kanako bahin sa mga kalisdanan nga adlawadlaw nilang gisagubang sa ilang mga palibot, aron magpabilin silang matinud-anon sa mga katungdanan sa pagtuo ug sa nasayran nila sa Ebanghelyo.

Taas ang oras sa among panag-istorya bahin niini ug, sa kataposan, moabot kami sa mao gihapon nga konklusyon: “Kon mag-inusara lang ka imposible nga naa kay mabuhat, apan kon magtinabangay ta, makalahutay ra gayod kita”. Mao usab kini ang gipasalig ni Jesus mismo sa dihang misaad siya: “Kay kon may duha o tulo nga magkatigom sa akong Ngalan, anaa ako uban kanila” . Ug uban Kaniya matuman ra gayod ang tanang butang.

~gikan ni Augusto Parody Reyes uban sa mga kagrupo sa Pulong sa Kinabuhi~