“Ang Dios, Gugma”: mao kini ang labing masanagong hulagway sa Dios nga makit-an nato sa Balaang Kasulatan; kaduha lang kini mabasa nato, dinhi niining tudling nga gikan sa usa ka sulat o pahimangno nga milanog sa mensahe sa ikaupat nga Ebangelyo. Ang misulat ani usa sa mga tinun-an nga nakasaksi sa espiritwal nga tradisyon ni San Juan, Apostol. Misulat siya ngadto sa usa ka Kristohanong katilingban niadtong primerong siglo; kinsa nagsagubang na intawon sa malisod nga pagsulay: ang di-pagsinabtanay, pagkabahin-bahin, mahitungod sa pagtuo ug pamaagi sa pagsaksi niini.

Ang Dios Gugma: diha sa iyang kaugalingon gipuy-an niya ang kahingpitan sa pag-inambitay isip Santisima Trinidad ug nag-awas kining maong gugma ngadto sa iyang mga binuhat. Kadtong modawat Kaniya gihatagan Niyag gahom aron mahimong Iyang mga anak[1] nga makabaton sa Iya mismong DNA – maantigong mohigugma. Walay bayad ang  Iyang gugma, giluwas ta niini gikan sa tanang kahadlok ug pagkamanggi-ulawon.[2]

Aron matuman ang saad sa pag-inambitay ngadto sa usagusa: – kita anaa sa Dios ug ang Dios anaa kanato – kinahanglang “magpabilin” ta niini mismong gugma nga puno sa kalagsik, lab-as, ug mabungahon. Tungod niini ang mga tinun-an ni Jesus gidapit sa pag-higugmaay sa usagusa, itahan ang ilang kinabuhi, magpaambit sa ilang kaayohang materyal kang bisan kinsa nga nanginahanglan. Tungod aning gugmaha ang katilingban magpabiling nagkahiusa, may paglaum sa umaabot ug matinud-anon sa usagusa.

“Ang Dios gugma ug ang nagkinabuhi subay sa gugma anaa sa Dios ug ang Dios anaa kaniya.”

Usa kini ka makusganon ug klarong pagsangyaw alang usab kanato, karong panahona, tungod kay usahay malumos ta sa mga wala damhang panghitabo ug lisod kontrolahon sama pananglit sa pandemiya o mga personal ug katilingbanong masub-anong panghitabo. Mora tag nahisalaag, nangalisang ug natental sa pagtagô sa kaugalingon, daw giparilan ang kaugalingon aron ipanalipod batok niadtong mihagit sa atong kaseguroan – imbes nga magtukod tag taytayan aron makighimamat sa atong isigkatawo.

Sa atong kahimtang karon, pwede pa bang magpadayon tag pagtuo sa gugma sa Dios? Pwede pa bang magpadayon sa paghigugma?

Si Josiane, taga-Lebanon, wala siya sa iyang nasod sa dihang nakabalita siya nga gibombahan ang pantalan sa Beirut, sa miaging Agosto 2020. Gipabuhos niya ang iyang gibati ngadto sa iyang mga kaila nga sama kaniya nagpuyo sa Pulong sa Dios: “Miusbong sa akong kasingkasing ang tumang kaguol, kasilag, hinagpis, kasubo, ug nawad-an kog paglaum. Nangutana ako: Dili ba diay igo na ang nahiagoman sa Lebanon hangtod karon? Mibalik-lantaw ko sa lugar, nga naugdaw, diin ko gipanganak ug midako;  daghan ang akong mga paryente ug mga kaila nga nangamatay, nasamdan ug mieskapo; didto ang mga palasyo, mga eskwelahan, mga ospital nga giadtoan ko kaniadto, karon nagun-ob na ug wala nay kapuslanan.

“Naningkamot ko nga mopuyo duol sa akong inahan ug mga igsoon, gitubag dayon nako ang mga mensahe sa daghang mga tawo nga nagpakisayod ug nabalaka sa akong kahimtang. Buot kong moabag kanila pinaagi sa pag-ampo ug pagpaminaw sa tanang pagpahungaw sa ilang gibati.. Buot kong motuo ug NAGATUO AKO nga kining akong pakighimamat sa mga tawong nag-antos sa tumang kasakit, usa ka tawag sa Dios; nga unta kitang tanan motubag pinaagi sa gugma nga gibubô niya sa atong mga kasingkasing. Bisan taliwala sa mga luha, nadiskobrehan ko ang kahayag nga misanag gikan sa daghang mga taga-Lebanon. Kasagaran mga batan-on, nga namangon, misud-ong sa ilang palibot ug nagdalag mga butang nga makatabang sa mga nagkinahanglan. Mitungha na usab sulod sa akong kasingkasing ang paglaum; nakapamalandong ko atubangan niining mga batan-on nga andam sa pagtahan sa ilang kinabuhi bisan sa natad sa politika, tungod kay ang solusyon alang kanila mao ang dalan sa diyalogo, pakigkokabildo pinaagi sa mga kasingkasing nga nagsinabtanay, sa pagdiskobre nga managsoon ra kitang tanan.”

“Ang Dios gugma ug ang nagkinabuhi subay sa gugma anaa sa Dios ug ang Dios anaa kaniya.”

Bililhon kining gisugyot ni Chiara Lubich aron mapuy-an nato ning Pulong sa Kinabuhi: “Dili mahimong buwagon ang gilansang sa Krus sa Nabanhaw nga Kristo. Duha kini ka nawong sa mao mismong Misteryo sa Dios-Gugma[3] […] Sa dihang ihalad nato ang atong kaugalingon ngadto Kaniya, paninguhaon nato nga dili na ta maghunahuna pa niini; hinuon tumanon ang kabubut-on sa Dios alang kanato, diha mismo sa lugar natong gipuy-an: […] maninguha ta sa paghigugma sa atong kasilinganan. Kon buhaton nato kini, masinati nato ang talagsaon ug wala damhang mga risulta: mabuhong ta sa kalinaw, sa gugma, ug sa tim-os nga kalipay ug kahayag. […]. Ug unya, tungod aning kasinatian, mas makatabang ta sa atong mga kaigsoonan sa pagkaplag ug kahupayan taliwala sa mga luha, ug bisan tuod gihasol sa mga bug-at nga problema  makahatag kini ug kagaan sa balatian nga mao ray gipangandoy sa kasingkasing sa tawo.”[4]

Letizia Magri

[1] Cf. Juan 1:12, 1 Juan 3:1

[2] Cf. 1 Juan 4:18

[3] Cf. 1 Juan 4:10.

[4] C. Lubich, Pulong sa Kinabuhi, Enero 1984.