Si Jesus nagpadulong ngadto sa Jerusalem tungod kay haduol na ang katumanan sa Iyang Misyon; nahiabot Siya sa usa ka balangay, ug mihapit sa balay ni Marta ug ni Maria. Ang ebangelista nga si San Lucas nagsaysay bahin sa pag-abiabi sa duha ka managsoon sa dihang miabot si Jesus: si Marta, sama sa naandan ug isip tagbalay, «nagkapuliki sa daghan niyang buluhaton»1 tungod kay mao man ang mando sa tradisyon, samtang si Maria, «naglingkod sa tiilan sa Ginoo, ug namati sa Iyang mga pulong»(v.39). Ang hugot nga pagpamati ni Maria wala magkatakdo sa pagkapuliki ni Marta; ug tuod man, sa dihang mireklamo kang Jesus kay gipasagdan lang siya sa iyang igsoon sa mga gimbuhaton, ang Ginoo mitubag kaniya: «Ay, kanimo Marta! Naguol ug nahingawa ka sa daghang mga butang, nga unta usa ra man ang gikinahanglan. Nakapili si Maria sa labing maayo, ug walay makakuha niini gikan kaniya.» (Luc. 10: 41-42). Kining tudling mabasa nato taliwala sa Sambingay mahitungod sa Maayong Samaryanhon (nga nagtudlo kanato sa kahalangdon ug kahataas sa gugma sa isigkatawo) ug ang Pagtulon-an ni Jesus mahitungod sa Pag-ampo (nga sa walay duhaduha mao ang pahina nga nagtudlo sa kahataas ug kahalangdon sa atong relasyon uban sa Dios-Amahan). Nan, mao kini ang saktong sukod sa pagtimbangtimbang sa atong gugma sa Dios ug sa atong isigkatawo.
“Nga unta usa ra man ang gikinahanglan”
Tungod kay duha man ka babaye ang gihisgotan nato ning tudling sa ebanghelyo. Ang pakigkokabildo ni Marta kang Jesus nagpasabot unsa gayod diay sila kasuod; mao gayod nga nakareklamo siya atubangan sa ilang Maestro. Apan unsa man diay ang serbisyo nga gipangayo ni Jesus? Buot unta siya nga si Marta dili mahingawa, nga unta mogawas siya sa naandang tulumanon sa tradisyon alang sa mga babaye ug nga unta, mohunong na siya aron mamati sa mga Pulong sa Ginoo, sama sa gibuhat ni Maria; ug tungod niiini nabag-o ang iyang tulumanon: nahimo siyang usa ka tinun-an. Ang mensahe niining bersikulo, kasagaran ginabale-walâ lamang kay di-magkatakdo sa kinabuhing buhong sa aktibidad ug kinabuhi sa pagpamalandong; morag duha ka pamaagi kon unsay angay pilion aron pagtuman sa gitakda sa relihiyon, apan si Marta ingon man si Maria nahigugma kang Jesus ug buot silang moalagad Kaniya. Sumala sa Ebangelyo, sa tinuoray, wala maghisgot nga ang pag-ampo ug ang pagpaminaw sa Pulong sa Dios mas importante pa kaysa gugma sa isigkatawo. Buot ipasabot nga angay gayod natong makat-onan kon unsaon pagbugkos niining duha ka gugma aron dili gayod sila mabugtô. Duha ka gugma, ang usa alang sa Dios ug ang usa alang sa isigkatawo, nga unta, dili sila magkabingkil; hinuon mahingpit sila uban sa usagusa tungod kay ang Gugma usa ra.
1 Lc 10,40. Il verbo perispàomai ha un duplice valore: può significare sia “essere completamente occupato/essere fortemente sovraccaricato”, sia “essere distolto/distratto”.
Via di Frascati, 306 – 00040 ROCCA DI PAPA (Roma) – Italia – +39-0694798-9 – operadim@focolare.org – www.focolare.org
“Nga unta usa ra man ang gikinahanglan”
Nagpabilin karon ang pangutana kon unsa diay ang usa ra ka butang nga gikinahanglan? Aron masabtan nato, makatabang ning tudling nga nag-una: “Ay, kanimo Marta !…” (v. 41). Sa pagsangpit niining ngalana, nga morag sinugdan sa pagpangasabâ, kon buot hunahunaon, mamatikdan nato ang personal nga “tawag sa bokasyon”. Morag maamgohan nato nga si Jesus nagtawag kang Marta sa pagbag-o sa iyang pakig-relasyon kang Jesus, ‘magborda siyag bag-ong mga hilo’ nga unta dili sama sa usa ka ulipon nga nag-alagad lamang kondili sama sa suod nga higala nga may hugot nga relasyon uban kaniya. Misulat siChiara Lubich: «Gipahimug-atan ni Jesus kining nahitabo aron mapatin-aw Niya kon unsa gayod ang gikinahanglan sulod sa kinabuhi sa tawo . […] Ang pagpaminaw sa Pulong sa Dios. Ug alang kang San Lucas, nga maoy nagsulat ning tudling sa Ebangelyo: Ang pagpamati sa Pulong sa Dios nagpasabot usab nga puy-an ta kini. […] Mao usab kini ang angay mong buhaton: dawaton mo ang Pulong sa Dios, hatagig luna aron mabag-o ka tungod niini. Ug dili lang kutob dinhi. Kinahanglang magmatinud-anon, ibaton ang tanan sulod sa kasingkasing aron maporma pag-usab ang imong kinabuhi, sama sa yuta diin gitago sa ilawom ang binhi aron moturok ug mamunga. Nan, kita usab magdalag mga bag-ong bunga, nga mapûpô gikan sa mga pulong sa Dios»2.
“Nga unta usa ra man ang gikinahanglan”
Pila kaha ang mga higayon nga maangkon nato diin moduaw ang Maestro ug mosulod gayod sa atong balay, pareho ni Marta ug ni Maria, diin sa tiilan Niya makapamati sa Iyang mga Pulong isip tinuod nga mga tinun-an? Kasagaran ang mga kahingawa, ang dili maayong panglawas, mga buluhaton ug usab ang mga pagsadyasadya, mga katagbawan maoy motidlom kanato sa lino sa daghang buluhaton, ug mao hinuon, ang motulon sa mga oras diin unta makahunong ta sa makadiyot aron moila sa Ginoo ug aron mamati Kaniya.
Kining Pulong maoy usa ka bililhon nga higayon diin makabansaybansay ta sa pagpili sa labing maayo alang kanato. Sa laktod nga pagkasulti, maminaw ta sa Iyang mga Pulong aron maangkon nato ang espiritual nga kagawasan, nga maoy magmando sa atong mga lihok ug gimbuhaton diha sa adlawadlaw nga pagkinabuhi, mga buhat isip bunga sa usa ka relasyon nga gimandoan sa Gugma, kay naghatag ug kapuslanan sa atong pagserbisyo ug pagpaminaw sa usagusa ug ngadto sa Dios.
Letizia Magri
_______________________________________________________________________
2 C. Lubich, Parola di Vita luglio 1980, in eadem, Parole di Vita, a cura di Fabio Ciardi (Opere di Chiara Lubich 5; Città Nuova, Roma 2017), pp. 176-177.
