Ang tudling sa Pulong sa Kinabuhi ning bulana kinutlo gikan sa Libro sa Genesis. Mga pulong gilitok ni Agar, ang ulipon ni Sarai nga gihatag niya kang Abramo isip asawa, kay dili man siya makaanak ug aron makabaton ug kaliwat si Abramo. Sa pagkasayod ni Agar nga nagsabak siya, nagpagarbo siya ug gibiaybiay niya si Sarai. Sa dihang gidaugdaog siya ni Sarai napugos siya pagkagiw sa kamingawan. Dinhi gayod ning dapita nahitabo ang talagsaong pakigtagbo sa Dios ug sa babaye; nakadawat siyag saad gikan sa Ginoo nga makabaton ug mga kaliwat sama sa kasabotan nga gihimo Niya kang Abramo. Lalaki ang iyang gipanganak ug ginganlan niyag Ismael, ug ang kahulogan mao nga “Nakadungog ang Dios”, tungod kay gidungog sa Ginoo ang pagpakitabang ni Agar ug gihatagan niyag mga kaliwat.
“Usa ka Dios nga makakita”.
Ang gibati ni Agar nagsalamin sa usa ka panghunahuna nga komun sa karaang kalibotan, ang mga tawo dili makasugakod ug pakigtagbo sa bisan kinsang nilalang sa Langit ug magpabilin gihapon nga buhi. Nasorpresa si Agar ug mapasalamaton nga wala siya mamatay. Nakasinati siya sa gugma sa Dios didto gayod sa disyerto, usa ka hamili nga dapit diin ang tawo makasinati ug personal nga pakighimamat sa Dios. Si Agar nakamatikod sa Iyang presensya ug nabati niya ang gugma sa Dios nga “nakakita” niya diha sa iyang mga pag-antos, usa ka Dios nga mapuangoron ug gilibotan sa Iyang gugma ang iyang mga binuhat. «Dili siya usa ka Dios nga walay presensya, halayo, nga walay pagtagad sa panghitabo sa kalibotan, sama sa mga panghitabo sa tagsatagsa kanato. Daghan ang mga higayon nga masinati nato ang Iyang presensya. Anaa Siya karon sa akong kiliran, kanunay siyang nag-uban kanako, nasayod siya sa tanan mahitungod kanako nakig-ambit siya sa akong mga hunahuna, diha sa kalipay, sa kada pangandoy; nakigtambayayong kuyog kanako sa akong mga kahingawa, ug sa matag pagsulay nga akong gisagubang»1.
“Usa ka Dios nga makakita.”
Kining Pulong sa Kinabuhi nagbuhig kaseguradohan ug naghatag kahupayan: wala diay kita mag-inusara sa atong pagpanaw ning kinabuhia. Gihigugma ta sa Dios. Usahay, sama ni Agar, bation nato nga kita “mga langyaw” ning kalibotana, o mangita tag mga agianan aron makaikyas gikan sa mga sakit ug bug-at nga kahimtang. Apan angay gayod kitang motuo nga anaa ang Ginoo ug mosalig sa atong pagpakig-uban Kaniya ug kini maoy maghatag kanatog kagawasan, naghatag pagsalig ug posibilidad sa pagsugod kanunay padulong sa kausaban.
Mao kini ang kasinatian ni P. nga nag-inusarang nagpuyo sa tibuok panahon sa pandemic. Misugilon siya: «Sukad sa sinugdanan sa pagsirado sa among nasod ug gihunong ang tanang klase sa aktibidad nagpuyo kong nag-inusara sa akong balay. Walay tawo sa akong kiliran aron kuyog mi sa pagpuyo ning matang sa kasinatian; kutob sa akong mahimo gipuno ko ang matag adlaw sa mga bulohaton sa balay. Sa dihang milabay na ang mga adlaw, nag-anam pagkawala ang kadasig. Naglisod kog katulog magabii. Para nako morag dili na ko makaagwanta sa kalisang. Apan nabati nako ug kusog nga angay gayod nakong itugyan ang akong kaugalingon sa hingpit nga pagsalig sa Dios ug hugot nga pagtuo sa Iyang gugma. Wala ako magduda kay anaa gayod Siya uban kanako diha sa akong kiliran ug naghatag kahupayan sulod sa mga bulan nga ako nag-inusara. Sa ginagmayng mga timailhan nga moabot kanako gikan sa akong mga isigkatawo nasabtan nako nga wala ako mag-inusara. Sama niadtong higayon nga nagsaulog mi ‘online’ sa adlawng natawhan sa akong amiga, may miabot nga nagdalag ‘cake’ gikan sa akong silingan ».
“Usa ka Dios nga makakita.”
Tungod kay gipanalipdan ta sa presensya sa Dios, mahimo usab kitang mga mensajero sa Iyang gugma. Gani gitawag kita nga mag-alima sa mga gikinahanglan sa uban, sa pagtabang sa atong mga kaigsoonan diha sa ilang ‘kamingawan’, sa pakigduyog sa ilang kalipay ug sa ilang kaguol. Paninguhaon tang molingi nga mapuangoron atubangan sa isigkatawo sulod sa mga katilingban diin kita nahisakop.
Mohunong tag makadiyot aron magpaduol sa mga tawo nga nangitag kahulogan ug tubag sa daghang mga pangutana bahin sa kinabuhi: mga amigog amiga, paryenti, mga kaila, mga silingan, isigkatrabahante, mga tawong galisod sa kwarta o malagmit sinalikway sa katilingban.
Angay hinumdoman ug ipaambit nato kadtong mga bililhong higayon diin kita nakakaplag sa gugma sa Dios ug nasayran nato ang kahulogan sa atong kinabuhi.
Kuyog ta sa pag-atubang sa mga kalisdanan aron mahipalgan nato samtang naglatas sa atong mga disyerto ang presensya sa Dios sulod sa kasaysayan, nga makatabang kanato sa pagpadayon puno sa pagsalig sa atong pagpanaw sa kinabuhi.
~ Sinulat ni Patrizia Mazzola ug mga kagrupo sa Pulong sa Kinabuhi ~
