Karong bulana, ang Pulong sa Kinabuhi naghisgut na usab bahin sa usa sa “kabulahanan”. Usa ni ka malipayon ug dinasig nga pang-hinaut gikan kang Elizabeth ngadto kang Maria, kinsa miduaw aron pagtabang kaniya. Silang duha nagsabak. Mituo sila ug gipuy-an nila ang Pulong sa Diyos; tungod ani nasinati nila ang mabongahong gahum sa ilang mapubsanong kinabuhi.
Sa ebanghelyo nga sinulat ni San Lukas, si Maria ang pinaka-unang nakasinati’g puno nga kalipay sa iyang pakig-uban sa Diyos. Sa kinaunhang higayon naka-pamalandong si San Lukas bahin sa relasyon tali sa pagsangyaw sa Pulong sa Diyos ug ang pagtuo nga midawat niini; ang pagkamaminugnaon sa Diyos ug ang dili pinugos nga pagdawat niini.
Bulahan ka nga mituo nga matuman gayod ang mensahe sa Ginoo kanimo.
Si Maria ang tinuod nga magtutuo sa “gi-saad sa Diyos kang Abraham ug sa tanan niyang kaliwat.” Haw-ang siya sa iyang kaugalingon, mapa-ubsanon ug andam sa pagpaminaw sa Pulong hangtud nga ang Pulong sa Diyos nahimong tawo diha sa iyang sabakan, ug tungod ani ang Diyos misulod sa tawhanong kahimtang.
Walay makasinati sa pagka-inahan sama kang Maria, apan makasundog ta sa iyang pagsalig sa gugma sa Diyos. Kong, inubanan sa kasing-kasing nga andam sa pagdawat sa pulong; ang iyang mga saad mahimo usab nga kinabuhi dinhi kanato; ug makahimog mabungahon, sa daghang paagi, ang atong kinabuhi –isip lumolupyo, ginikanan, estudiante, trabahante o politiko; batan-on man o hamtong, himsog o masakiton.Unsaon man kong ang pagtuo nato di kasaligan? Padayon ta pagsalig sa kalooy sa Diyos. Di Siya mo-undang pagsunod kanato; hangtud madiskobre pag-usab ang Iyang pagka-maunongon ug iyang panalangin.
Bulahan ka nga mituo nga matuman gayod ang mensahe sa Ginoo kanimo.
Didto sa mga bungtod sa “yutang balaan”, sa atong kapanahonan, dunay laing inahan nga may hugot nga pagtuo mitudlo sa iyang mga anak sa pama-agi sa pagpasaylo ug dayalogo nga iyang nadiskobre sa ebanghelyo. Gamay ni nga timaan gikan sa ilang yuta –ang duyan sa sibilisasyon—nga dugay nang nangandoy sa kalinaw ug kalig-on, bisan sa mga sumosunod sa kalain-laing tinuohan.Mipa-ambit si Margaret: bata pa kami nasakitan ug nasuko tungod kay ang ubang mga bata nga among silingan mi-ingon nga dili sila makig-hugoy-hugoy kanamo.
Misugyot ang among ginikanan sa pag imbitar kanila sa among balay diin gihatagan sila’g pan nga gikan pa sa hugnohan unya gihatagan pa silag madala sa ilang pamilya. Sukad niadto na-amigo namo sila. Ang magtutukod sa Focolare si Chiara Lubich nagpaluyo kanato sa pag baton ug pagtuo nga madasigon; kini ang iyang gisulat: Si Maria ang sunod kang Jesus sa kahibalo unsaon pag sunod sa Diyos sa pinaka maayo ug perpekto nga pama-agi. Mao ni ang tuboran sa Iyang pagkabalaan ug kahalangdon.Kon si Jesus ang Pulong nga nahimong tawo, si Maria tungod sa iyang pagtuo sa Pulong, siya ang Pulong nga gipuy-an. Gumikan sa iyang pagka-binuhat, sama Siya kanato.
Nan pwede tang motuo nga ang tanang mga saad ni Jesus ang Pulong matuman gayod. Sama kang Maria, peligro’g mahimo tang maka-atubang sa di masabtang kahimtang nga usahay dala sa pagpuyo sa Pulong. Apan sangpotanan usab sa atong pagpuyo sa Pulong ang talagsaong butang o hitabo, nga ginagmay man o dinagko, masinati kanila nga mituo sa Pulong.
Maka-puno ug daghang libro kon i-asoy ang mga hitabo nga maka-pamatuod ani. Sa atong pagbasa sa balaan libro masinati nato ang Pulong sa Diyos. Inubanan sa dakong pasalig, ablihan ang atong kasing-kasing sa pagpamati kong unsay gihangyo ni Kristo nato ug ang mga saad nga matuman ra. Dili madugay atong madiskobrehan nga motuman siya sa Iyang mga saad.
Bulahan ka nga mituo nga matuman gayod ang mensahe sa Ginoo kanimo.
Karon nga nangandam ta para sa Pasko mahinumduman nato ang katingalahang saad ni Jesus nga ma-ana-a Siya uban kanila nga midawat ug nagapuyo sa sugo sa paghinigugmaay. “Kay kon may duha kun tulo kaninyo magkatigom sa akong ngalan atua ako kanila.”
Inubanan ug hugot nga pagtuo aning saad, maningkamot ta nga unta mahimugso pag-usab si Jesus karon diha sa atong mga panimalay ug sa atong kadalanan, pinaagi sa atong paghigugmaay ug tininuod nga pagpamati sa usag-usa, ug pinaagi sa inigsoon nga pagdawat sa usag usa, sama kang Maria ug Elizabeth
Letizia Magri
