“Bag-o lang nahimugso si Mariana ug segun sa konsulta sa mga Doctor, aduna diay siya’y lesion sa utok. Ang risulta mao nga dili siya makasulti ug dili makalakaw. Nadungog namo ang tawag sa Dios nga panggaon namo siya sumala sa kahimtang nga gihatag Niya sa bata. Daw migakos kami sa mga bukton sa Dios Amahan nianang adlawa» misulat si Alba, usa ka batan-ong inahan nga taga-Brazil. Mipadayon siya pagsaysay: «Upat ka tuig nga buhi si Mariana uban kanamo ug ang iyang kabilin mao ang gugma. Wala gayod namo madungog ang mga pulong ‘papa’ ni ‘mama’ gikan sa iyang baba, apan sa iyang kahilom, ang iyang mga mata nakig-abiabi kanamo, daw bituong nagkislapkislap. Wala gayod kami makatudlo kaniya sa unang mga lakang kami hinuon ang gitudloan niya unsaon paglakat diha sa gugma, diha sa paghikalimot sa among kaugalingon aron pagmahal kaniya. Si Mariana para sa tibuok pamilya usa ka gasa sa gugma sa Dios nga mahimong itingob sa usa lamang ka tudling: ang gugma dili mapadayag sa mga pulong lamang.”
Unsa ang nahitabo karon sa tagsatagsa nato ka kinabuhi: atubangan sa imposibleng kapasidad sa pagdumala sa atong mga kahimtang dinhi sa yuta nanginahanglan ta sa kahayag, bisag bidlisiw lang sa adlaw aron makatultol ta sa agianan paggawas, ang mga lakang nga angay buhaton nato karon, padulong sa kaluwasan ngadto sa bag-ong kinabuhi.
“Ang Ginoo kahayag ug kaluwasan ko; busa wala akoy kahadlokan.”
Ang kangitngit sulod sa kagul-anan, sa kahadlok, sa katahap, sa pag-inusara, sa kahimtang “nga nakigbatok kanato” nga naghanaw sa atong mga damgo, usa ka kasinatian nga maamgohan nato sa bisag asang suok sa kalibotan sa bisag kanus-ang takna sa kasaysayan sa tawo dinhi sa yuta; sama gayod sa gipadayag niining karaang pangaliya nga kinutlo gikan sa libro sa mga Salmo.
Ang tigsulat usa ka tawo nga morag gipasanginlan sa di-matarong nga pamaagi, gisalikway sa tanan, naghulat sa silot. Nameligro ang iyang kahimtang daw nagpadulong siya sa usa ka dimalas nga kaugmaon, apan gitugyan niya ang iyang kaugalingon sa Dios. Nasayod siya nga ang Dios dili mobiya sa iyang katawhan nga nagsagubang sa mga pagsulay, nakaila siya sa makaluwas nga kamot sa Dios; tungod niini makaplagan niya ang kahayag diha sa Dios ug may kapasilonganan siya nga dili gayod magun-ob.
Nasayod siya sa kaugalingon niyang kahuyang mao nga gitugyan niya kini sa tumang pagsalig sa Dios, mihangop sa Iyang presensya sa kaugalingong kinabuhi ug sa tumang pagsalig nagpaabot sa kadaugan kon matapos na ang tanan subay sa di-matagna nga dalan sa Iyang Gugma.
“Ang Ginoo kahayag ug kaluwasan ko; busa wala akoy kahadlokan.”
Mao kini ang saktong mga higayon aron duslitan nato pag-usab ang pagsalig sa gugma sa Dios Amahan, nga walay laing pagbuot kondili ang kalipay sa iyang mga anak. Andam Siyang mopas-an sa atong mga kalisod aron kita dili prisohon sa atong kaugalingon; hinuon, gawasnon kitang makig-ambit sa uban sa atong kahayag ug paglaum.
Ang Pulong sa Kinabuhi, segun sa gisulat ni Chiara Lubich, nag-agak kanato taliwala sa dalan sa kangitngit padulong ngadto sa kahayag, gikan sa “ako” ngadto sa “kita” : “[…] Awhag kini sa pagpalagsik sa pagtuo: Anaa ang Dios ug gihigugma ako Niya. […] Nahimamat nako ang usa ka tawo? Angay kong motuo nga pinaagi niining tawhana ang Ginoo adunay buot isulti kanako. Nagkugi ko’g trabaho? Nianang taknaa way-hunong ang akong pagsalig sa Iyang Gugma. May giluom kong kasakit? Nagatuo ako sa Gugma sa Dios. May gikalipayan ko? Pinangga ako sa Dios. Ang Ginoo ania sulod kanako, kanunay nag-uban kanako, nasayod Siya sa tanan mahitungod kanako, nakig-ambit sa akong mga hunahuna, mga kalipay, mga gipangandoy, nakigtambayayong kanako sa mga problema, matag pagsulay sa akong kinabuhi. Unsaon nako pagbangon sa akong pagkasegurado? […] Diha sa pagpangita Kaniya taliwala kanatong tanan. Sumala sa Iyang saad: anaa Siya sa matag higayon nga may duha o tulo nga nagkahiusa sa Iyang Ngalan. Makighimamat ta sa atong isigkatawo diha sa mahigugmaong pakigsandurot nga gimugna sa Ebangelyo, uban sa mga tawo nga nagbansaybansay sa Pulong sa Ginoo, mag-inambitay ta sa mga kasinatian ug matagamtam nato ang mga bunga sa Iyang Presensya: kalipay, kalinaw, kahayag, kaisog. Magpabilin Siya diha sa tagsatagsa kanato ug di-mawagtang ang atong pagbati nga duol ra Siya ug nag-asikaso kuyog kanato diha sa adlawadlaw natong pagpuyo.”
Letizia Magri
