Kung isinasabuhay mo ang kasalukuyan, at isinasabuhay mo ito nang mabuti, nakagagawa ka ng mga gawang tumatagal, kahit na nakipag-usap ka lamang sa isang tao o sa isang klase ng mga tao. Sa pakikitagpo mo sa isang tao o sa isang grupo lamang, nakakatagpo mo ang buong sangkatauhan. Katulad ng mahusay na paggawa natin ng isang partikular na gawain, tinutupad natin ang buong kalooban ng Diyos. Lubos kang nasisiyahan sa pagdanas nito, dahil niyayakap mo ang kawalang-hanggan.
Nangangahulugan ito ng mabuting paggawa ng ninanais ng Diyos sa kasalukuyan, at ng paggawa nito gaya ng nais mangyari ng Diyos, ayon sa kanyang sistema at mga layunin. Halimbawa, kung naghahanda ka ng talumpati sa harap ng publiko, gawin mo ito gamit ang lahat ng tulong ng Espiritu Santo na nasa iyo. Pagkatapos, imungkahi mo ito sa iyong mga kaibigan sa paraang namamayani ang pagmamahal sa isa’t isa. Maging mapagpakumbaba at handang ‘kalimutan’ ang iyong ideya upang ito ay ‘mamatay,’ mabulok, at muling isilang mula sa pagkakaisa… Sa ganitong paraan, ang iyong mga salita ay mananatili at magbubunga. At anumang bagay na sa ibang paraan ay maaaring makagawa ng mabuti sa isang tao at mawala pagkatapos, ay makakabuti sa marami at magpapatuloy na gawin ito.
Ang pagsasabuhay ng kasalukuyan sa ganitong paraan ay nagbibigay ng katangian ng kaganapan, dahil ito ay naaayon sa buhay ni Hesus sa atin. Siya na nasa atin ang nakagagawa ng mga gawang nananatili.
Kung mapagtanto mo na hindi mo nagawa nang maayos o bahagya mo lang nagawa ang iyong parte, ihabilin mo ito sa puso ni Hesus nang may malaking pagtitiwala. Magkaroon ng kamalayan na anumang sandali ay maaaring huling sandali na natin (at na maaaring kailanganin nating iwan ang mga bagay na hindi natin nagawa nang mabuti). Ngunit pakatandaan mo na nais lamang ni Hesus na mahalin ka at sa mga konkretong paraan. Handa siyang punan ano man ang kulang, patawarin ang ating mga pagkakamali at itago ito sa iba. Tulad ng gagawin ng isang ina, at higit pa!
Kaya kahit na sa kasong ito, makatitiyak ka: nagawa na ang lahat; natupad na ang lahat.
Chiara Lubich
Isinalin ni Jose Aranas mula sa aklat na Here and Now: Meditations on Living in the Present. Manila: New City Press, 2014, pp. 54-55.
