“Ayaw ninyo santaa ang Espiritu Santo, ug ayaw tamaya ang mga mensahe gikan sa Dios. Sutaa ninyo ang tanan ug ampingi ang maayo. Isalikway ang tanang matang sa dautan.”

Mensahe gikan sa Dios ug pagsusi, pakig-istoryahanay ug pagpaminaw. Mao kini ang mga tambag ni San Pablo alang sa komunidad nga bag-o lamang naglakaw sa dalan sa pagtuo.Taliwala sa nagkadaiyang gasa sa Espirito,
dako kaayo ang pagtahod ni San Pablo sa mga mensahe sa Dios.

Ang propeta dili mao kadtong tawo nga makatag-an kon unsay umaabot sa kaugmaon kondili siya nga nakadawat sa gasa sa pagkamaalamon ug pagsabot sa personal ug sa katilingbanong kasaysayan sumala sa mga mata sa Dios.

Apan ang tanang gasa gigiyahan sa usa ka mas taas pa gayod nga gasa: ang langitnong gugma, inigsoonay nga gugma.

Si San Agustin mipamatuod nga ang langitnong gugma lamang maoy makaabli sa pangisip aron makahukom
ta kon unsay angay buhaton atubangan sa nagkalainlaing mga sitwasyon.
 

“Sutaa ninyo ang tanan; ampingi ang maayo…“ 
 

Kinahanglang maalamon tang mosabot dili lamang sa atong mga nahibal-an kondili maantigo usab tang moila sa daghang mga ideya ug mga posibilidad nga mahimo sa mga tawong duol ra kanato o atong gikaistorya nga daw mas maayo ug pangatarongan bisag dili kaayo yanong sabton ang ilang gipahayag; gani, gumikan usab sa mga tawo nga sa wala damha atong nahimamat.
 

Mahinungdanon kaayo nga atubangan sa tanan magbaton tag matinud-anong kasingkasing; nga unta angkonon ta sulod sa atong konsensya nga limitado ang atong pamensar ug panabot.
 

Kining Pulong sa Kinabuhi mahimong usa ka panultihon nga sagopon nato sa matag sitwasyon sa pakigkokabildo ug
paghimog lisod nga mga desisyon.
 

Maminaw ta sa atong isigkatawo, dili usab kinahanglang dawaton ang tanang sugyot apan nasayod ta nga posible gayod nga makakaplag tag butang nga maayo sa ilang gipanulti; mosangpot kini sa pag- abli sa kasingkasing ug
panghunahuna. Tungod sa gugma atong gihaw-ang ang atong kaugalingon aron sa ingon niini makabaton ug posibilidad nga magkauban ta sa paghimo ug kaayohan.
 

“Sutaa ninyo ang tanan; ampingi ang maayo…“ 

Si Padre Timothy Radcliffe, usa sa mga teologo nga mitambong sa Sinodo sa mga Obispo sa Simbahang Catoliko, ipamatuod nga “ang mahimo nato dinhi sa Sinodo mao nga dili ta angay mahadlok sa pagkamatinud-anon sa usagusa bahin sa atong mga duda ug mga pangutana: mga pangutana diin kitang tanan walay klarong tubag. Busa parehas ra ta, kauban sa pagpangita ug mga solusyon; giuhaw ug buot mokab-ot sa kamatuoran.”
 

Samtang nakig-istorya siya uban sa pipila ka mga focolarino, si Margaret Karram misaysay sa iyang napamalandongan:
 

“Sulod sa akong kaugalingon, nakaamgo ko, nga sa daghang higayon nawagtangan kog kaisog sa pagsulti kon unsa gayod ang naa sa akong hunahuna : tingali tungod kay nahadlok ko nga di ko nila masabtan, tingali aron di ko makasulti ug mga butang nga lahi ra gayod sa gisugyot sa kadaghanan.

Nasabtan nako, nga kon kita mga ‘uhaw ug buot mokab-ot sa kamatuoran’ buot ipasabot nga magbaton tag kinaiya sa
pagkahaduol, ngadto sa usagusa, diin kitang tanan nagtinguha lamang sa kabubut-on sa Dios, diin kitang tanan kuyog ug nagkauban sa pagpangita sa maayo”
 

“Sutaa ninyo ang tanan; ampingi ang maayo…“ 
 

Mao kini ang kasinatian ni Antía usa ka sakop sa grupo sa mga artista sa Mosaico, nga gipasiugdahan didto sa Spain niadtong 2017 isip usa ka kalihokan sa Gen Rosso. Giapilan kini sa mga kabatan-onan sa Spain nga pinaagi sa arte didto sa ilang laboratorio nagpaambit sa ilang mga kasinatian sa pagpuyo sa panag-inigsoonay.
 

Misaysay si Antía : “May kalabotan kini sa akong gitahod nga mga hiyas: kalibotan sa pag-inigsoonay, diin ang tagsatagsa kanamo (bata pa kaayo, walay klarong abilidad, mahadlokon…) mihatag sa among kaugalingong salmot niining proyekto.
 

Tungod sa Mosaico mituo ko nga ang kahiusahan sa katawhan dili imposible ug dili kutob damgo lamang, bisan daghan ang kalisdanan nga among gisagubang ug sobrang kahago sa trabaho ang nasinati namo niini.
 

Mitubo ko diha sa pagtrabaho kauban sa tibuok grupo, pinaagi sa pakigkokabildo nga usahay makaingon ka nga
dritso-dritso, walay lipod-lipod ug kasagaran gisakripisyo ko ang akong mga idea bisan pag sakto para nako.
 

Ang resulta mao nga may “kaayohan” nga sa hinayhinay natukod namo, tungod kay kuyog ming tanan sa paghimo niini.”
 

Gikan ni Patrizia Mazzola ug mga kagrupo sa Pulong sa Kinabuhi