Matag tuig, ang mga Kristyanos nga sakop sa nagkalainlaing  Simbahan mogahin ug panahon alang sa hiniusang pag-ampo, aron magdungan sa paghangyo sa Amahan sa gasa sa panaghiusa, sumala sa gitinguha ni Jesus.

Kini ang iyang pagbuot “aron motuo ang kalibotan” (Jn17:21); ang panaghiusa lamang ang makakab-ot ug kausaban sa kalibotan, makatukod ug pag-inambitay, pag-inigsoonay ug hiniusang pagtinabangay. Ang panaghiusa, labaw sa tanan, usa ka gasa gikan sa Dios; busa, angay gayod nga, inubanan sa dakong pagsalig, mangaliyupo ta ngadto sa Amahan.

Nasinati sa usa ka grupo sa España, nga nagpuyo sa Pulong sa Dios, nga kining atong gihisgotan tinuod gayod. Pipila na ka tuig ang milabay, atol sa pagsaulog nila sa Semana sa Pag-ampo alang sa Panaghiusa sa mga Kristyanos, morag may nagtukmod kanila sa pag-ampo sa grasya sa panaghiusa ug sa pagtukod ug mga taytayan. Misulat si Margarita: “Miadto mi sa lider sa Ekumenismo sa among “diocese”, ug sa mga paroko, ug sa mga pari sa simbahang Orthodox, ug mga pastor sa simbahang Protestante. Nagtapok mi isip  hiniusang hugpong sa mga Kristiyanos aron mag ampo. Ang kinaunhan namong giadto mao ang parokya sa mga Katoliko ug unya miadto mi sa simbahang Orthodox. Sa matag panagtigom namo ang matag simbahan napuno sa kalipay nga gumikan sa presensya sa Dios. Siya ra gayod ang makaabli sa mga dalan padulong sa panaghiusa”.

Alang sa tuig 2021, ang komunidad sa mga monghe ug mongha sa Grandchamp misugyot ug usa ka “motto” nga naghatag ug kahayag subay sa dalan nga atong gilaktan, mahinungdanon kaayo kini, kinutlo gikan sa Ebangelyo ni San Juan:

“Pabilin kamo sa akong  gugma:  ug makabunga kamog daghan”

Usa kini ka awhag nga naghagit kanato sa pagpuyo ug apil sa paningkamot para sa panaghiusa sa mga Kristiyanos niining mga talagsaong takna, ug ipadayon ta sa paghimo niini sa tibuok tuig,  sa tibuok natong kinabuhi. Ang atong pagkatibulaag ug pagkabahin-bahin usa ka grabeng samad, nga angay gayod tambalan;  una sa tanan,  pinaagi sa kaluoy sa Dios ug unya sa pagpanlimbasog nga mag-ilhanay kitang tanan, diha sa pagtahod sa usag-usa ug pinaagi sa hiniusang pagsaksi sa Ebangelyo. Pinaagi niining mga pulonga, gipadayag ni Jesus kanato ang saktong mga lakang nga angay pagabuhaton: una sa tanan “magpabilin” diha sa Iyang gugma.

Busa gikinahanglan gayod nga mas ihugot ang atong personal nga relasyon ngadto Kaniya. Itugyan nato Kaniya ang atong kinabuhi, motuo ta sa Iyang kaluoy. Sa tinuoray, si Jesus “nagpabilin” kanunay nga maunongon kanato.

Sa samang higayon, gitawag kita Niya sa way pag-ukon-ukon sa pagsunod Kaniya aron sama Kaniya atong ihalad ang tibuok natong kinabuhi isip usa ka gasa sa Amahan. Gidapit kita Niya sa pagpuyo sama Kaniya pinaagi sa pagtabang sa tumang kalumo sa mga panginahanglan sa atong isigkatawo kinsa uban kanato adlaw-adlaw sa makadiyot lang o sa taastaas nga panahon. Misugyot Siya buhaton nato kini inubanan sa pagkamanggihatagon nga walay bayad nga gipaabot, aron “makapamunga ta ug daghan”.

“Pabilin kamo sa akong gugma:  ug makabunga kamog daghan”

Haum kaayo niining panahon karon ang gipamulong ni Chiara Lubich, didto sa Ginebra niadtong bulan sa Oktubre 2002, atol sa pagsaulog saAdlaw sa mga Reformed Churches^[1]: «[…] Kulang ug gikinahanglan gayod ang gugma dinhi sa kalibotan! […] ang atong Ginoong Hesukristo miingon nga ang kalibotan makaila lamang kanato nga kita iyang mga tinun-an, kay pinaagi kanato, makaila sila Kaniya, diha sa paghigugmaay sa usag-usa, diha sa panaghiusa: “Kon maghigugmaay kamo, mahibalo ang tanan nga kamo akong mga tinun-an” (Jn 13:35). […] nasabtan ni namo: kini karong panahona naghangyo gikan kanato ug gugma, nangayo sa panaghiusa, sa pag-inambitay, sa hiniusang pagtinabangay. Nag-awhag usab sa mga Simbahan sa pagpakighiuli diha sa panaghiusa nga dugay nang samaran latas sa katuigan. Mao kini ang awhag sa kausaban sa tanang mga Reforma gikan sa Langit; mao kini ang kinaunhan ug halangdong lakang padulong sa unibersal nga pag-inigsoonay kuyog sa tanang katawhan: lalaki man o babaye. Sa way pagduhaduha ang kalibotan makabaton ug pagtuo kon kita may panaghiusa. Mao kini ang giampo ni Jesus: “Nga mausa unta sila (…) aron motuo ang kalibotan” (cf Jn 17:21). Kay mao kini ang kabubut-on sa Dios! […]. Hatagan unta kita Niya sa grasya, bisag dili kita makakita sa hingpit nga katumanan niini.  Hinaut unta nga abagan ta Niya bisan sa pag-andam lamang sa katumanan niining tanan»

Letizia Magri