Kinsa ba ang wala makahilak sa tibuok niyang kinabuhi? Kinsa ba ang wala makaila’g mga tawo nga naghingapin ang mga luha tungod sa tumang kasubô? Niining atong panahon karon, ang atong mga balay gibaha sa tanang klase sa balita gikan sa tibuok kalibotan pinaagi sa mga makita nato sa T.V. Mameligro ta kon maanad ta sa atong makit-an, hangtod nga matig-a ang atong kasingkasing atubangan sa sapâ sa kasakit nga morag nag-alirong kanato.
Bisan si Jesus mismo mihilak ug nasayod Siya sa naghingapin nga mga luha sa iyang katawhan, tungod kay nabiktima sila sa pag-atake sa mga langyaw. Daghang masakiton, mga kabus, mga biyuda, mga ilo, mga sinalikway, ug mga makasasala ang midangop Kaniya aron makapaminaw sa iyang mga Pulong, nga makahupay ug makaayo sa lawas ug kalag.
Sa Ebangelyo ni San Mateo, si Jesus mao ang Mesiyas, ang nagtuman sa mga saad sa Dios alang sa Israel. Tungod niini nagwali Siya:
“Bulahan ang nagsubo kay lipayon sila sa Dios!”
Dili ta makaingon nga si Jesus way-panumbaling sa atong mga kasakit ug pagsulay; tinguha niya nga matambalan ang atong mga kasingkasing nga natig-a sa pag-atiman sa kaugalingon’g kaayohan lamang. Buot niyang hupayon ang atong nasinating kahaw-ang, ug hataga’g gahom ang atong mga lihok.
Mao ni ang gisulat ni Chiara Lubich, sa dihang mikomentaryo siya niini mismong mga Pulong sa Ebangelyo:«[…] Kining mga pulong ni Jesus wala magpasabot nga ang mga way kalipay dalhon Niya ngadto sa yanong pag-surender, apil sa saad nga may ganti silang mapaabot. Apan ang “karon” maoy anaa sa Iyang hunahuna. Sa tinuoray, ang Iyang Gingharian bisan ug wala pa moabot sa hingpit nga katumanan, anaa diha Kaniya, kinsa mibuntog sa kamatayon pinaagi sa Iyang pagkabanhaw, human nga giantos Niya ang tumang kasakit. Ania usab kini sulod sa matag kasingkasing Kristohanon. Ang Ginoo anaa dinhi kanato. Ang Santa Trinidad nagapuyo sulod kanato. Busa ang kabulahanan nga gisangyaw ni Jesus matuman ug masinati na sukad karon. […] Ang mga kasakit ug kalisod mopadayon, apan adunay bag-ong kalagsik nga motabang kanato sa pagsagubang sa mga pagsulay dinhi sa kalibotan; ug kalagsik usab sa pagtabang sa uban diha sa ilang mga kalisod, aron sila makabangon, aron kining mga pagsulay ilang dawaton sama sa pagdawat ni Jesus, tungod kay kining tanan pamaagi sa kaluwasan».
“Bulahan ang nagsubo kay lipayon sila sa Dios!”
Makakat-on ta kang Jesus, kon unsaon nato nga mahimo tang saksi ug instrumento sa gugmang malumo ug mabungahon sa Dios Amahan, para sa usagusa. Ang Iyang gipanudlo maoy pagsugod sa bag-ong kalibotan diin ang gamot sa atong pagpakig-uban sa pagpuyo ning kalibotan matarong; makadani sa presensya sa Dios uban sa katawhan. Mao ni ang way- paghubas nga tuboran sa kahupayan nga maoy makahunong sa mga luha.
Mao ni ang kasinatian nga gipaambit ni Lena ug ni Philippe, nga taga Lebanon, atubangan sa ilang mga higala nga kabahin sa kapunongan sa Simbahan: «Mga minahal nga kaigsoonan, nagpasalamat kami sa inyong mga mensahe alang sa Pasko sa Pagkabanhaw nga mahinungdanon kaayo karong tuiga. Maayo ang among kahimtang ug maampingon nga dili matakdan sa kagaw nga–Covid 19. Tungod kay gipangulohan man namo ang “ParrainageLiban”[1], dili kami makaako nga magpuyo lang sa panimalay; mogawas kami matag duha ka adlaw, aron maseguro namo nga moabot ang hinabang ngadto sa mga pamilya: kwarta, sinina, pagkaon, tambal ug uban pa… Bisan pa kaniadto sa wala pa ang Covid-19, ang sitwasyon sa Ekonomiya sa among nasod bug-at na kaayo, ug pareho sa tibuok kalibotan, niining mga panahona misamot kalisod. Apan ang mga panalangin nga hulog sa langit wala gayod magkawang: ang kinaulahiang hinabang miabot niadtong miaging semana gikan sa usa ka taga-Lebanon nga nagpuyo gawas sa nasod. Mihangyo ni Lena nga seguroon unta niya nga kompleto ang ilang mga gikaon, katulo sa usa ka semana. Busa, giandam nila kini para sa doce ka pamilya para sa tibuok buwan sa Abril. Pagkaanindot nga komperma sa Gugma sa Dios nga dili gayod maapsan sa Iyang pagkamanggihatagon».
Letizia Magri
